Það er komið sumar, eða er það ekki annars? Oft hefur maður upplifað sólríkari daga en á þessu vori, en við skulum ekki örvænta, sumarið ný byrjað og auðvitað á það eftir að verða frábært.

Við kláruðum sveitarstjórnarkosningarnar í lok maí og sumir eflaust kátari en aðrir eins og gengur. Nú bíðum við spennt eftir að sjá hvern við fáum sem bæjarstjóra. Hvernig sem raðast í nefndir og ráð, þá efast ég ekki um  að það unga fólk sem nú tekur við stjórnartaumunum vilji sinna störfum sínum af heilindum og að bærinn okkar verði ennþá betri að fjórum árum liðnum, en hann er í dag. Ég óska þeim öllum góðs gengis í sínum störfum.

Mér fannst óhugnanleg fréttin sem birtist á Húnahorninu  20. maí s.l. um plastagnir sem starfsfólk Bio Pol á Skagaströnd er að uppgötva í sýnum sem það tekur úr sjónum á Húnaflóa. Fréttir af svona plastmengun í höfunum hafa birst af og til í fjölmiðlum og þá utan úr heimi, en þegar þetta er komið svona nálægt okkur þá hrekkur maður við. Það er nú þegar  fullt af fólki farið að takmarka plastnotkun á sínum heimilum en það er erfitt að sleppa því alveg og þess vegna verðum við öll að taka höndum saman og gera allt sem í okkar valdi stendur til að sporna við þessari gríðarlegu mengun sem plastið veldur.

Það er lítið mál að hætta að kaupa plastpoka undir vörurnar sem keyptar eru í búðinni og nota þess í stað fjölnota poka, bæði til að bera vörurnar í heim og einnig undir ávexti og grænmeti, þ.e.a.s. það litla af því sem ekki er pakkað í frauðplastbakka og svo plastað allan hringinn. Þær eiga heiður skilinn konurnar sem sitja við að sauma pokana sem liggja frammi í Kjörbúðinni, viðskiptavinum að kostnaðarlausu  sem gleymt hafa pokanum sínum heima. Munið  bara að þið eigið ekki pokann, heldur hafið hann að láni og skilið honum aftur í næstu búðarferð svo næsti viðskiptavinur sem gleymir poka geti notað hann. Út á það gengur þetta.

Það má segja að hver stórviðburðurinn reki annan hjá okkur þetta vorið. Opnun Heimilisiðnaðarsafnsins er árlegur sumarboði, hér var haldið landsmót Skotíþróttasambands Íslands, hin vinsæla kvennareið, sem nýtur vaxandi vinsælda, skóflustunga tekið að gagnaveri, loksins, stórmót hestamannafélaga sýslunnar og nýlokið er vel heppnaðri Prjónagleði, þar sem forsetafrú Íslands, frú Eliza Reid heiðraði okkur með nærveru sinni. Framundan eru svo Smábæjaleikarnir og hátíðarhöld þjóðhátíðardagsins og ef við horfum aðeins til nánustu framtíðar styttist óðum í Húnavöku. Segið svo að ekkert sé um að vera hér í bænum okkar.

Með von um sólríkari daga kveð ég að sinni. Vonandi verður aðeins hlýrra á Jónsmessunni, en þá eigum við að fara út og baða okkur upp úr dögginni. Held ég leggi ekki í það í 4 stiga hita.

Sumarkveðja, Nöldri.