Bæjarhátíðin Eldur í Húnaþingi verður haldin dagana 26.-30. júlí í Húnaþingi vestra. Á hátíðinni verður eitt og annað á dagskrá, margt hefðbundið en annað nýtt af nálinni. Opnunarhátíðin verður með sérstaklega skemmtilegu sniði í ár en hún hefst á skrúðgöngu með ýmsum verum. Kjötsúpan verður á sínum stað og Húlladúlla ætlar að sýna brot af sinni snilli. Handbendi brúðuleikhús sýnir Tröll á hátíðinni, óhefðbundið jóga er á dagskránni, Lalli töframaður og svo margt meira.

Ýmsir hefðbundnir viðburðir verða í ár, eins og Melló Músika, skotbolti, borðtennis, tölvuleikjanámskeið, hoppukastalar og annað fjör á fjölskyldudeginum, tónleikar í Borgarvirki, fjölskyldudansleikur og svo mætti lengi telja. Meðal þeirra sem ætla að koma fram er Fókus, Eyþór Ingi, AmabAdamA og Buff.

Dagskrá hátíðarinnar má sjá hér.

Eldur í Húnaþingi er bæjarhátíð í Húnaþingi vestra sem var fyrst haldin árið 2003 og hefur síðan þá verið árlegur viðburður.  Um framkvæmd hátíðarinnar í ár sér stjórn Menningarfélags Húnaþings vestra, en henni til halds og trausts er undirbúningshópur hörkuduglegra sjálfboðaliða. Árið 2012 var undirritaður samningur til fjögurra ára milli hátíðarinnar, Húnaþings vestra, Landsbankans Hvammstanga, KVH, Forsvar/Hagsæld og Sláturhúss KVH um árlegan styrk árin 2012-2015 svo unnt sé að ráða verkefnastjóra við hátíðina. Þessi samningur var endurnýjaður í lok árs 2015 og gildir núverandi samningur árin 2016-2020.

Öll önnur vinna við undirbúning hátíðarinnar er unnin í sjálfboðavinnu af íbúum í héraðinu. Margt fólk úr ólíkum áttum hefur komið að skipulagningu hátíðarinnar ár hvert og hafa margar skemmtilegar og frumlegar hugmyndir litið dagsins ljós. Samt sem áður hefur ákveðin hefð skapast í kringum hátíðina og eru þar ákveðnir viðburðir sem skipað hafa sér fastan sess.