Snemma á þessu ári hitti ég fólk sem að ég hafði ekki séð áður. Við áttum kurteisislegt spjall og ekki leið á löngu fyrr en að ég var spurð að því hvar ég byggi. Ég sagðist eiga heima á Blönduósi og brosti. Undrunarsvipurinn sem kom á manneskjuna sem ætlaði vart að trúa sínum eigin eyrum. Hún sagði tilbaka "Býrðu á BLÖNDUÓSI? AFHVERJU?" Mér fannst þetta mjög fyndið því þetta var jú "borgarbarn í húð og hár”. Ég svaraði í einlægni að mér fyndist frábært að búa á Blönduósi. Í nálægð við náttúruna, ekkert ys og þys né vesen, ég hefði allt sem ég þyrfti og vel það. Auk þess þá ég vildi ala börnin mín upp út á landi en ekki í höfuðborginni. Þá kom annar skrítinn svipur á manneskjuna og hún spurði íhugul "En er bíó þar?” Ég skellihló inn í mér.

Þó svo að það sé ekki bíó á Blönduósi þá er það frábær staður til að búa á. Mér finnst dásamlegt að þekkja flesta í bænum og heilsa þeim út á götu. Ég vil ekki týnast í maurahrúgunni á Höfuðborgarsvæðinu. Ég vil vera hlekkur í samfélaginu. Í minni samfélögum út á landi skiptir hver og einn máli. Við þurfum öll að vinna saman að sameiginlegum hagsmunum og markmiðum og stuðla að því að bæjarfélagið okkar vaxi og dafni. Það er hlutverk okkar að efla Blönduósbæ þannig að hann sé aðlaðandi staður til að búa á og að uppbyggingu fari fram á öllum sviðum samfélagsins.

Að vera á lista í sveitarstjórnarkosningunum er stórt skref út fyrir þægindarammann minn. En skref sem ég var viljug til að taka til þess að taka þátt í að standa vörð um hagsmuni okkar og eflingu samfélagsins sem ég hef valið mér að búa í. Ég er nýbökuð móðir og var að klára fæðingarorlofið. Með móðurhlutverkinu sé ég hlutina í öðru ljósi og þarfnast annarra hluta en ég gerði áður. Það er margt sem að ég hef rekið mig á seinasta árið sem má betur fara í bæjarfélaginu okkar og mig langar að koma þeim hlutum á framfæri og betrumbæta. Ásamt því er ég ötull talsmaður heilbrigðs lífstíls og vill leggja mig fram við að efla lýðheilsu samfélagsins. Einnig langar mig til að ásýnd Blönduóssbæjar sé falleg og snyrtileg og að glæsilega umhverfinu okkar sé vel við haldið. Ég vil stuðla að eflingu leik- og grunnskólans og að börnin okkar fái öll þau tækifæri sem þau hafa áhuga á. Síðast en ekki síst þá vill ég auka lóðaframboð eða finna aðra góða lausn á húsnæðisvandanum sem hér stafar og auka atvinnu.

Við hjónin vorum 21 árs þegar að við keyptum okkar fyrstu fasteign og hún var á Blönduósi. Eftir kaupin þá rigndu yfir okkur spurningarnar „Afhverju á Blönduósi?” Svarið var einfalt. Hér líður okkur vel. Fjölskyldur og ættingjar okkar beggja eru á svæðinu og við viljum vera út á landi. Það besta við fasteignakaupin fyrir utan hið augljósa var hversu glaðir bæjarbúar voru með það að ungt par skyldi vilja setjast að í bænum. Það var dásamlegt að flytja á Blönduós því að það tóku allir svo vel á móti okkur og voru ánægðir með þetta framtak okkar. Þetta staðfesti enn betur fyrir mér að ég var á réttum stað og ég hef oft talað um þetta við fólk sem flytur í bæinn og það er alltaf sammála mér. Á Blönduósi er vel tekið á móti fólki og gott að vera. Ég er stolt af því að vera partur af þessu samfélagi og fá tækifæri að taka þátt í að efla það enn meira. Ég tel L-listann vera samansettan af frábæru fólki undir leiðtoga sem er drífandi og kraftmikill. Listinn hefur gert flotta hluti á kjörtímabilinu og okkur langar að halda áfram og gera enn betur. Ég er þakklát og hreykin af því að vera hluti af þessum flotta hóp og hlakka til að sjá hvað framtíðin ber í skauti sér.

Kæru kjósendur, ég vona að þið kynnið ykkur málefni listanna beggja og nýtið kosningaréttinn ykkar. Undanfarnar vikur hafa komið mér skemmtilega á óvart og mér hefur fundist mjög gaman að taka þátt í kosningabaráttunni. Mig langar að þakka ykkur fyrir stuðninginn og við skulum vinna saman að frekari uppbyggingu Blönduósbæjar. Setjið X við L næstkomandi laugardag.

Arnrún Bára
5. sæti L-listans í Blönduósbæ