Kómedíuleikhúsið sýnir sprellfjörugt og alíslenskt jólaleikrit í Félagsheimilinu á Hvammstanga í kvöld og í Spákonuhofinu á Skagaströnd annað kvöld. Báðar sýningarnar hefjast klukkan 17:30. Leikritið heitir Leppalúði og fjallar um hinn alltof gleymda mann Grýlu og föður jólasveinanna þrettán. Velt er upp spurningum eins og hver Leppalúði sé eiginlega, hvort hann tali mannamál og síðast en ekki síst, hvort hann sé í alvörunni til.

Höfundur verksins og leikari er Elfar Logi Hannesson. Um búninga sér Alda S. Sigurðardóttir, tæknilegar lausnir og galdrar eru í höndum Kristjáns Gunnarssonar og leikmynd og gríma eru sköpunarverk Marsibilar G. Kristjánsdóttur sem einnig er leikstjóri.

Miða má panta í síma 8917025 og einnig er miðasala á staðnum á sýningardegi. Miðaverð er kr. 2.500.