Út er komin skýrslan Kolefnisspor Norðurlands vestra sem unnin var af Stefáni Gíslasyni hjá Environice fyrir Samtök sveitarfélaga á Norðurlandi vestra. Hún er hluti af áhersluverkefni Sóknaráætlunar Norðurlands vestra árin 2018-2019. Í skýrslunni segir að langmesta losun gróðurhúsalofttegunda á Norðurlandi vestra komi frá framræstu landi eða tæp 90% enda sé svæðið eitt mesta landbúnaðarhérað landsins. Árangursríkasta leiðin til að draga úr losun gróðurhúsaloftegunda sé endurheimt votlendis á óræktuðum framræstum jarðvegi.

Sagt er frá þessu á vef SSNV. Þar kemur fram að Stefán hélt kynningu á fyrstu niðurstöðum skýrslunnar á á umhverfisráðstefnu SSNV sem haldin var á Húnavöllum þann 28. maí í fyrra. Megin niðurstöður hafa ekki tekið breytingum frá því að sú kynning var haldin. Erindi Stefáns er aðgengilegt á Facebook síðu SSNV og hefst á 10. mínútu upptökunnar.

Varðandi fyrstu skref í endurheimt votlendis nefnir Stefán að þau ættu að felast í því að greina þau svæði sem liggur beinast við að endurheimta, svo sem með tilliti til núverandi notkunar og eignarhalds. Gera þurfi grunnrannsóknir á svæðinu til að meta líklegan árangur en hann ráðist af jarðvegsgerð, dýpt, aldri skurða og fleiri þátta. Slík vinna og aðrar aðgerðir til endurheimts votlendis verði að sjálfsögðu aldrei unnar öðruvísi en í góðu samstarfi við landeigendur.

Í skýrslunni er einnig bent á leiðir til að minnka kolefnisspor í samgöngum, brennslu metans á urðunarstaðnum í Stekkjarvík, minni orkunotkun í landbúnaði svo fátt eitt sé talið. Til mótvægisaðgerða er talin landgræðsla og skógrækt en til hennar gefast fjölmörg tækifæri á Norðurlandi vestra.

Eins og fram kemur í lokaorðum skýrslunnar geta útreikningar á kolefnisspori aldrei orðið 100% réttir eða óvefengjanlegir. Engu að síður gefi þeir útreikningar sem fram koma mikilvægar vísvendingar um hvar sé brýnast að grípa til aðgerða og hvaða aðgerðir séu líklegastar til að skila mestum árangri í að minnka kolefnisspor landshlutans.

Á vef SSNV segir að starfsfólk samtakanna muni nú skoða hver næstu skref verkefnisins verði og gera um það tillögu til stjórnar samtakanna.

Skýrslu um kolefnisspor Norðurlands vestra er að finna hér.