|
16:30 |
14. feb. 2020 |
Rafræn íbúagátt hjá Húnaþingi vestra
Á vef Húnaþings vestra hefur verið opnuð rafræn íbúagátt. Í henni geta íbúar nálgast útgefna reikninga frá sveitarfélaginu og skráð sig inn á svæði hitaveitunnar. Þar finna þeir allar helstu upplýsingar eins og um notkun, álestra, hreyfingayfirlit, reikninga og viðskiptastöðu. Notendur skrá sig inn á íbúagáttina með íslykli. Með íbúagáttinni er sveitarfélagið að auka þjónustu við íbúa sveitarfélagsins og stuðla að umhverfisvænum rekstri. Og með henni mun Húnaþing vestra hætta útprentun hitaveitureikninga. |
|
13:31 |
14. feb. 2020 |
Tjón á tveimur bæjum í Húnaþingi
Töluvert tjón hefur orðið í óveðrinu á tveimur bæjum í Vatnsdal og Víðidal. Stefán Vagn Stefánsson, yfirlögregluþjónn á Norðurlandi vestra sagði í viðtali við Ríkisútvarpið í hádeginu að mikið tjón hafi orðið í Vatnsdal þar sem útihús, vélar og íbúðarhús hafi skemmst og að viðbragðsaðilum gangi illa að komast á vettvang vegna veðurs. Nokkur viðbúnaður er hjá yfirvöldum en aðgerðarstjórn er á Sauðárkróki og vettvangsstjórn er á Blönduósi. |
|
12:05 |
14. feb. 2020 |
Frumvarp um lágmarksíbúafjölda sveitarfélaga komið í samráðsgáttina
Drög að frumvarpi til breytinga á sveitarstjórnarlögum sem innleiðir á ný ákvæði um lágmarksíbúafjölda sveitarfélaga hafa verið birt í samráðsgátt stjórnvalda til umsagnar. Samkvæmt frumvarpinu verður lágmarksíbúafjöldi 250 frá almennum sveitarstjórnarkosningum árið 2022 og 1.000 frá almennum sveitarstjórnarkosningum árið 2026. Allir hafa tækifæri til að senda inn umsögn eða ábendingar en frestur til að skila umsögn er til og með fimmtudagsins 27. febrúar 2020. |
|
11:24 |
14. feb. 2020 |
Norðurlandsmót í júdó á Blönduósi
Norðurlandsmót í júdó var haldið á Blönduósi um síðustu helgi og mættu 35 keppendur frá þremur júdófélögum á Norðurlandi; Tindastóli á Sauðárkróki, Pardusi á Blönduósi og KA á Akureyri. Norðurlandsmót, sem er samstarfsverkefni júdófélaganna, hafa verið haldin á Blönduósi frá árinu 2015 og var nú haldið í fimmta sinn í röð. Halda átti mótið í byrjun nóvember á síðasta ári en var frestað. Sagt er frá þessu á vef Tindastóls. |
|
10:56 |
14. feb. 2020 |
Augnlæknir á Heilbrigðisstofnuninni á Blönduósi
Tilkynning frá HSN
Örn Sveinsson augnlæknir verður með móttöku á Heilbrigðsstofnun Norðurlands á Blönduósi dagana 25. - 27. febrúar 2020. |
|
06:58 |
14. feb. 2020 |
Fjallvegir lokaðir – ekkert ferðaveður
Appelsínugult ástand
Ekkert ferðaveður er landinu og eru fjallvegir meira og minna lokaðir. Á Norðurlandi er vegirnir um Holtavörðuheiði, Vatnsskarð, Þverárfjall, Siglufjarðarvegur og Öxnadalsheiði lokaðir. Appelsínugul veðurviðvörun tók gildi klukkan 05:00 í morgun á Norðurlandi vestra og er hún í gildi til klukkan 22:00 í kvöld. Gera má ráð fyrir austan stormi eða roki í dag með vindhrapa á bilinu 20-30 metrum á sekúndu, hvassast á fjallvegum. Förum varlega. |
|
15:41 |
13. feb. 2020 |
Eftirmál óveðursins – FUNDI FRESTAÐ
Opnum fundi um eftirmál óveðursins sem halda átti í Víðihlíð í kvöld er frestað. Gestir fundarins að sunnan treysta sér ekki til að mæta vegna slæmrar veðurspár.
Nýr fundartími auglýstur síðar. |
|
15:40 |
13. feb. 2020 |
Skólahald raskast í Húnaþingi á morgun
Fréttin hefur verið uppfærð
Allt skólahald í Húnavatnssýslum fellur niður á morgun, föstudaginn 14. febrúar vegna slæmrar veðurspár. Íþróttahúsið og sundlaugar verða einnig lokaðar. Vegagerðin hefur birt yfirlit yfir þá vegi sem eru á óvissustigi vegna veðursins sem er á leiðinni. Á Norðurlandi vestra má búast að veginum um Holtavörðuheiði verði lokað frá klukkan 04:00 í fyrramálið. Búast má við að veginum um Vatnsskarð verði lokað frá klukkan 04:00 í fyrramálið og að lokunin standi til 07:00 15. febrúar. |
|
15:33 |
13. feb. 2020 |
Árshátíð Blönduskóla færð til um einn dag vegna slæmrar veðurspár á morgun
Árshátíð Blönduskóla hefur verið færð aftur um sólarhring vegna veðurofsans sem spáð er á morgun föstudaginn 14. febrúar. Verður hún því laugardaginn 15. febrúar kl. 19:00 í Félagsheimilinu á Blönduósi. |
|
15:28 |
13. feb. 2020 |
Íþróttamiðstöðin á Blönduósi lokuð föstudaginn 14. febrúar
Tilkynning frá forstöðumanni
Vegna slæmrar veðurspár er Íþróttamiðstöðin á Blönduósi lokuð á morgun, föstudaginn 14. febrúar. |
|
14:53 |
13. feb. 2020 |
Kormákur/Hvöt spilar í B-riðli í sumar
Búið er að ákveða riðlaskiptingu 4. deildar í knattspyrnu karla á Íslandsmótinu 2020. Alls mæta 32 lið til leiks þegar keppnin hefst í maí en það er einu liði fleira en í fyrra. Átta lið eru í hverju riðli að þessu sinni og fjögur ný lið eru með í ár, Íþrótta- og boltafélag uppsveita, Skandinavía, Knattspyrnufélagið Bessastaðir (KFB) og Blix. Þrjú eru hætt frá síðasta ári, Reykjavíkurliðin Fenrir, Kóngarnir og Úlfarnir. Sameiginlegt lið Kormáks og Hvatar spilar í B-riðli. |
|
11:54 |
13. feb. 2020 |
Blönduósbær bendir á spennandi tækifæri
Blönduósbær birtir heilsíðuauglýsingu í atvinnublaði Morgunblaðsins í dag þar sem vakin er athygli á fjölda starfa sem eru í boði hjá sveitarfélaginu, stofnunum og fyrirtækjum í bænum. Þá er einnig birtur listi yfir fasteignir sem eru til sölu á Blönduósi alls 15 talsins. „Blönduós er helsta þjónustumiðstöð landbúnaðar og ferðamennsku á Norðurlandi vestra. Staðsett á einu stórbrotnasta bæjarstæði landsins, umvafin fallegri náttúru. Blönduós er kraftmikið vaxtarsvæði með öflugri uppbyggingu iðnaðar, íbúðarhúsnæðis og þjónustu fyrir barnafjölskyldur,“ segir í auglýsingunni. |
|
07:53 |
13. feb. 2020 |
Framsókn boðar til opinna funda í Húnaþingi
Á kjördæmadögum Alþingis fer þingflokkur Framsóknarflokksins á 50 fundi um allt landi undir yfirskriftinni „Áfram veginn“. Þrír slíkir fundir verða haldnir í Húnaþingi í dag. Sá fyrsti fer fram klukkan 12 í Sjávarborg á Hvammstanga en þar ætla Sigurður Ingi og Líneik Anna að taka á móti gestum. Hinir tveir fundirnir fara fram á sama tíma, klukkan 17, á Skagaströnd og Blönduósi. Fundurinn á Skagaströnd verður á Kaffi Bjarmanesi þar sem Halla Signý og Þórarinn Ingi að taka á móti gestum. |
|
20:31 |
12. feb. 2020 |
Brjálað veður á föstudaginn
Gula veðurviðvörunin sem var í gildi fyrir föstudaginn hefur nú fengið appelsínugulan lit. Samkvæmt Elínu Björk Jónasdóttur, veðurfræðingi á Veðurstofu Íslands, verður hreinlega brjálað veður á landinu á föstudaginn. Á Norðurlandi vestra og Ströndum er spáð austan stormi eða rok með vindhraða á bilinu 20-30 metrar á sekúndu, hvassast á fjallvegum. Búast má við mjög hvössum og varhugaverðum vindhviðum við fjöll, staðbundið yfir 40 metrar á sekúndu. Blönduósbær hefur ákveðið að sorp verður sótt í dreifbýli á fimmtudag í stað föstudags vegna slæmrar veðursspár. |
|
13:29 |
12. feb. 2020 |
Heimir heldur tónleika í Blönduóskirkju
Karlakórinn Heimir heldur tónleika í Blönduóskirkju fimmtudaginn 20. febrúar næstkomandi klukkan 20:30. Efnisskráin er fjölbreytt, meðal annars verða fluttir valdir kaflar úr dagskrá kórsins tileinkuð Stefáni Íslandi. Einsöngvarar eru Birgir Björnsson, Þorgeir J. Andrésson, Agnar Gunnarsson og Björn Björnsson. Stjórnandi er Stefán R. Gíslason og undirleikari er Thomas R. Higgerson. |
Til baka
Loka
Prenta
