09:17 |
21. feb. 2020 |
Fjórða vinnsluholan á Reykjum
RARIK lauk nýverið við borun á fjórðu vinnsluholunni á Reykjum við Húnavelli vegna viðbótarvatnsöflunar fyrir hitaveitu Blönduóss og Skagastrandar. Á grundvelli niðurstöðu rannsóknarborana í árslok 2018 var staðsetning holunnar sem varð 1.200 metra djúp ákveðin. Á vef Feykis er haft eftir Rósant Guðmundssyni, kynningarstjóra RARIK, að borunin hafi gengið vel þrátt fyrir erfiðar aðstæður og misjafnt veðurfar. |
09:06 |
21. feb. 2020 |
Ráðin markaðs- og viðburðarstjóri Prjónagleðinnar
Textílmiðstöð Íslands hefur ráðið Gretu Clough sem markaðs- og viðburðarstjórnanda Prjónagleðinnar 2020 sem haldin verður á Blönduósi í 12.-14. júní í sumar. Textílmiðstöðin hlaut nýverið styrk frá Uppbyggingarsjóði Norðurlands vestra til að ráða í stöðuna. Greta hefur nú þegar hafið störf, að því er fram kemur á Facebook síðu Textílmiðstöðvarinnar en hún hefur getið sér gott orð fyrir Handbendi Brúðuleikhús á Hvammstanga og hefur víðtæka reynslu af viðburðarstjórnun og markaðssetningu. |
08:21 |
21. feb. 2020 |
Framkvæmdir að hefjast við viðbyggingu Grunnskóla Húnaþings vestra
Jarðvinna vegna viðbyggingar við Grunnskóla Húnaþings vestra er að fara af stað, að því er segir á vefsíðu sveitarfélagsins. Áætlað er að framkvæmdir vegna jarðvinnu standi fram á sumar. Svæðið verður afgirt með lausum girðingum og eru íbúar beðnir um að sýna aðgát í kringum vinnusvæðið og ræða við börnin um það einnig. Unnið verður að fleygun á klöpp á virkum dögum á milli klukkan 08:00 og 18:00 og laugardaga milli klukkan 10:00 og 16:00. |
14:17 |
19. feb. 2020 |
Tónleikum Heimis á Blönduósi frestað
Frá Karlakórnum Heimi
Vegna veðurútlits hefur verið ákveðið að fresta tónleikum Karlakórsins Heimis sem fyrirhugað var að halda á Blönduósi fimmtudagskvöldið 20. febrúar. Heimismenn eru þó ekki af baki dottnir, og munu heimsækja Blönduós við fyrsta tækifæri, það verður nánar auglýst síðar. |
12:03 |
19. feb. 2020 |
Uppspuni á ferðinni
Frá Textílmiðstöð Íslands
Hulda Brynjólfsdóttir framkvæmdastjóri Uppspuna er einn af stjórnarmönnum í Textílmiðstöðvar Íslands. Í samstarfi við Textílmiðstöðina mun Hulda koma í heimsókn fimmtudaginn 20. febrúar með garnið sitt. Hún spinnur garnið úr sinni eigin ull og ull sem hún kaupir af nágrönnum sínum. Hulda mun leggja áherslu á sokkagarnið sem reynst hefur vel og hefur vakið mikla lukku. Einnig verður hún með fullt af alls konar garni sem hún segir að gaman sé að sýna og segja frá. |
11:34 |
19. feb. 2020 |
Gul veðurviðvörun í kvöld og á morgun
Spáð er norðaustan hvassviðri eða stormi með snjókomu í kvöld og gildir gul viðvörun á Norðurlandi vestra frá klukkan 21 í kvöld og fram til klukkan 20 annað kvöld. Búast má við erfiðum akstursskilyrðum og mögulega getur færð spillst, sér í lagi á fjallvegum. Í kvöld spáir Veðurstofan norðaustan 15-23 metrum á sekúndu og síðdegis á morgun er gert ráð fyrir norðaustan 10-18 metrum á sekúndu. Gul viðvörun verður í gildi um mest allt land í dag og á morgun. Vetrarfærð er í öllum landshlutum, víðast hvar hálka eða snjóþekja en ekki fyrirstaða á helstu leiðum. |
08:08 |
19. feb. 2020 |
Konur í Austur Húnavatnssýslu takið eftir!
Tilkynning frá HSN
Konur í Austur-Húnavatnssýslu takið eftir. Krabbameinsleit verður á heilsugæslustöðinni á Blönduósi dagana 2. og 3. mars 2020. |
14:29 |
18. feb. 2020 |
Blönduósflugvöllur kom að góðum notum
Blönduósflugvöllur sannaði í gær enn og aftur gildi sitt og tilverurétt. Umferðarslys varð við bæinn Stóru-Giljá um miðjan dag í gær þegar tveir bílar rákust saman. Loka þurfti þjóðveginum og Þyrla Landhelgisgæslunnar var kölluð til hjálpar. Þyrlan lenti á Blönduósflugvelli sem er spölkorn frá Heilbrigðisstofnuninni og flutti þaðan slasaða til Reykjavíkur. Í síðasta mánuði lenti þyrlan á vellinum og flutti slasaða háskólanema til Reykjavíkur í kjölfar rútuslyss við bæinn Öxl. |
14:03 |
18. feb. 2020 |
Húnvetningur yfir Hljóðbókasafni Íslands
Mennta- og menningarmálaráðherra hefur skipað Marín Guðrúnu Hrafnsdóttur frá Skeggstöðum í Svartárdal í embætti forstöðumanns Hljóðbókasafns Íslands. Hljóðbókasafnið er ríkisstofnun undir yfirstjórn ráðherra, stofnað 1982. Hlutverk þess er að sjá þeim sem ekki geta fært sér venjulegt prentað letur í nyt fyrir bókasafnsþjónustu með miðlun á fjölbreyttu safnefni, þar á meðal námsgögnum, í sem bestu samræmi við óskir og þarfir notenda. |
11:06 |
18. feb. 2020 |
Námskeið í stafrænum vefnaði á Blönduósi
Námskeið í stafrænum vefnaði í TC2 vefstól var haldið í Textílmiðstöð Íslands á Blönduósi um síðustu helgi en það er hluti af rannsóknar- og þróunarverkefni Textílmiðstöðvarinnar sem nefnist Bridging Textiles to the Digital Future. Á námskeiðinu voru félagar úr Textílfélagi Íslands og fatahönnuður og textílkennari frá Akureyri. Kennt var hvernig hægt er að nota Photoshop forritið til að gera vefskjöl sem ofin eru í TC2 og ófu þátttakendur nokkrar prufur hver. |
22:11 |
17. feb. 2020 |
Viðurkenningar veittar fyrir framúrskarandi verkefni 2019 á Norðurlandi vestra
Á úthlutunarhátíð Uppbyggingarsjóðs Norðurlands vestra síðastliðinn fimmtudag var í fyrsta sinn veittar viðurkenningar fyrir framúrskarandi verkefni á sviði atvinnuþróunar og nýsköpunar annars vegar og á sviði menningar hins vegar. Sýningin 1238 á Sauðárkróki sem rekin er af fyrirtækinu Sýndarveruleika ehf. hlaut viðurkenninguna í flokki atvinnuþróunar og nýsköpunar og sýningin um Þórð kakala sem rekin er af Kakalaskála ehf. fékk viðurkenninguna í flokki menningar. |
21:54 |
17. feb. 2020 |
Uppbyggingarsjóðurinn úthlutar styrkjum
Úthlutað var styrkjum úr Uppbyggingarsjóði Norðurlands vestra við athöfn í Félagsheimilinu á Hvammstanga síðastliðinn fimmtudag. Alls bárust sjóðnum 113 umsóknir þar sem óskað var eftir 170 milljónum króna í styrki en úthlutað var 65 milljónum til 60 aðila sem standa að baki 76 verkefnum. Ávörp fluttu Haraldur Benediktsson, þingmaður Norðvesturkjördæmis og Lárus Ægir Guðmundsson, formaður úthlutunarnefndar Uppbyggingarsjóðs. |
20:55 |
17. feb. 2020 |
Aðalfundur Kirkjugarðs Blönduóss
Tilkynning frá stjórn
Aðalfundur Kirkjugarðs Blönduóss verður haldinn í Samstöðusalnum að Þverbraut 1 á Blönduósi, miðvikudaginn 19. febrúar klukkan 18.00. Á dagskrá eru venjuleg aðalfundarstörf, framkvæmdaáætlun næstu þriggja ára og önnur mál.
|
16:53 |
17. feb. 2020 |
Umferðarslys við Stóru-Giljá
Umferðarslys varð við bæinn Stóru-Gilja fyrr í dag þegar tveir bílar sem komu úr gagnstæðri átt rákust saman. Loka þurfti þjóðveginum vegna slyssins í um eina og hálfa klukkustund. Sex voru í bílunum og voru þeir allir fluttir til skoðunar. Þyrla Landhelgisgæslunnar lenti fyrir skömmu á Blönduósi og verða þrír fluttir á Landspítalann í Reykjavík. Verið er að fjarlægja bílana sem eru mikið skemmdir. |
16:18 |
17. feb. 2020 |
Nýr slökkviliðsstjóri í Húnaþingi vestra
Jóhannes Kári Bragason hefur verið ráðinn slökkviliðsstjóri Brunavarna Húnaþings vesta frá 1. mars næstkomandi til eins árs vegna leyfis Péturs Arnarssonar slökkviliðsstjóra. Jóhannes Kári er húsasmíðameistari og hefur löggildingu sem slökkviliðsmaður. Hann hefur verið starfandi hjá Brunavörnum Húnaþings vestra frá árinu 2002 til þessa dags. Sagt er frá þessu á vef Húnaþings vestra. |