Nýverið færðu Hollvinasamtök HSB Heilbrigðisstofnunninni á Blönduósi nýjan hjólastól. Stóllinn er gefinn í minningu Herdísar Einarsdóttur, en hún starfaði við stofnunina í hartnær 50 ár. Í mars sendu samtökin styrktarbeiðni að upphæð 10.000 krónur til 18 fyrirtækja í sýslunni. Það voru 9 fyrirtæki sem styrktu okkur. Þá minntust aðstandendur Herdísar heitinnar hennar með myndarlegu fjárframlagi og það gerði okkur kleift að kaupa stólinn.

Húnabyggð auglýsti í Fréttablaðinu um helgina eftir tillögum um nýtt byggðamerki og skal það hafa tilvísun í áberandi einkenni í náttúru svæðisins, sögu og ímynd. Skilyrði er að merkið hafi skjaldarlögun og sé í samræmi við meginreglur skjaldarmerkjafræðinnar, og er þá vísað til reglugerðar um byggðarmerki. Tillögum skal skilað í tveimur útfærslum, í lit og í svart/hvítu, sett upp á A4. Jafnframt skal fylgja lýsing á merkingu og meginhugmyndum.

Kormákur Hvöt lyfti sér upp úr fallsæti 3. deildar í gær með góðum sigri á Elliða en leikið var á Blönduósvelli. Ingvi Rafn Ingvarsson sá um markaskorun fyrir heimamenn og gerði þrjú mörk, sem dugðu til sigurs þar sem gestirnir úr Árbænum skoruðu bara tvö mörk. Leikurinn byrjaði fjörlega og strax á 4. mínútu skoraði Ingvi Rafn sitt fyrsta mark og fjórtán mínútum síðar var hann búinn að tvöfalda forystuna fyrir Kormák Hvöt. Elliði náði að minnka muninn áður en flautað var til hálfleiks.

Sextán nemendur Concordia háskólans í Montreal, sem verið hafa í vettvangsnámi í Textílmiðstöðinni á Blönduósi síðastliðinn mánuð, halda sýningu í húsnæði Kvennaskólans mánudaginn 27. júní klukkan 17-19. Nemendurnir hafa m.a. verið á þverfaglegu námskeiði þróuðu af Dr. Kathleen Vaughan frá Concordia háskólanum í Montreal í Kanada í samstarfi við Textílmiðstöð Íslands.

Glódís Perla Viggósdóttir, landsliðskona í knattspyrnu, á rætur að rekja til Skagastrandar. Þangað kom hún í heimsókn um síðustu helgi og spjallaði við stelpur sem eru að æfa knattspyrnu hjá Ungmennafélaginu Fram. Sagði hún frá sínu fótboltalífi og hvatti stelpurnar áfram en þær fengu að sjálfsögðu að taka myndir með fyrirmynd sinni.

Íbúar í Húnabyggð fundu fyrir jarðskjálfta klukkan rúmlega tíu í gærkvöldi sem hann átti upptök sín í Langjökli og var 4,6 að stærð. Fjöldi tilkynninga barst Veðurstofunni um skjálftann og komu m.a. frá Húnabyggð, Vesturlandi, höfuðborgarsvæðinu og Rangárþingi eystra. Samkvæmt mælingum Veðurstofunnar varð skjálftinn um 11 kílómetra norður af Hagajökli klukkan tólf mínútur yfir tíu. Fjöldi eftirskjálfta hefur mælst í kjölfarið, sá stærsti 2,9 að stærð.

Heilsugæsla: Grímuskylda er hjá skjólstæðingum með einkenni öndunarfærasýkinga eða grun um Covid. Hvetjum eldri skjólstæðinga og þá sem eru með undirliggjandi sjúkdóma að bera grímu við komu á heilsugæslu.

Hin (næstum) árlega kvennareið í Austur-Húnavatnssýslu verður farin laugardaginn 2. júlí næstkomandi. Lagt verður af stað frá Hæli klukkan 14:00 og endað í reiðhöllinni á Blönduósi síðdegis, en þar verður grillað og haft gaman. Þema í ár er frjálst skraut. Dregið verður í happdrætti og aldrei að vita nema einhver mæti með gítarinn.

Þrjátíu og einn lax hefur veiðst í Miðfjarðará sem af er sumri en áin opnaði fyrir laxveiði 15. júní síðastliðinn. Blanda fer rólega af stað, þar hófst laxveiði 5. júní og hafa veiðst níu laxar, sá fyrsti koma á land 13. júní. Víðidalsá opnaði 20. júní og hafa 16 laxar veiðst. Opnunin í ánni var lífleg og komu átta laxar á land, fjórir fyrir hádegi og fjórir eftir hádegi.

Húnaþing vestra auglýsir eftir umsóknum um styrk úr Húnasjóði vegna ársins 2022 og er sótt um með rafrænum hætti á vef sveitarfélagsins. Umsóknum skal skilað í síðasta lagi 8. júlí næstkomandi. Úthlutunarreglur sjóðsins má einnig finna á vef Húnaþings vestra.

Móttaka var haldin til heiðurs handhafa Eyrarrósarinnar 2021, Brúðuleikhúsinu Handbendi á Hvammstanga, á Listahátíð í Reykjavík í Iðnó síðastliðinn fimmtudag. Handbendi var stofnað árið 2016 af Gretu Clough sem jafnframt er leikstjóri, brúðuleikari og listrænn stjórnandi brúðuleikhússins.

Þórhalla Guðbjartsdóttir hefur verið ráðin skólastjóri grunnskóla Húnabyggðar. Þórhalla var áður skólastjóri Blönduskóla en var sagt upp, líkt og öðrum stjórnendum grunn- og leikskóla í Blönduósbæ og Húnavatnshreppi í kjölfar sameiningar sveitarfélaganna. Í apríl var auglýst eftir skólastjórnendum í sameinuðu sveitarfélagi og var starf skólastjóra, aðstoðarskólastjóra, leikskólastjóra og aðstoðarleikskólastjóra auglýst.

Hólar í Hjaltadal er okkur Norðlendingum helgur staður að fornu og nýju. Kirkju og skólasagan, náttúran og veðursældin hafa markað umgjörð sem lætur þá ekki ósnortna sem annaðhvort hafa búið þar eða kynnt sér til hlítar hve djúpt rætur menningar og þekkingar liggja á Hólum. Og enn er sáð til þeirrar uppskeru.

Stjórn Samtaka sveitarfélaga á Norðurlandi vestra lýsir yfir miklum áhyggjum af stöðu sauðfjárræktar í landshlutanum. Skorar hún á stjórn völd að taka stöðuna alvarlega og bregðast við með ákveðnum og markvissum hætti. „Mikilvægt er að til viðbótar við þær skammtíma aðgerðir sem þegar hafa verið kynntar verði unnið að langtímalausn. Lýsir stjórn SSNV sig tilbúna til samtals um leiðir og mögulegar aðgerðir,“ segir í bókun stjórnar SSNV frá fundi sínum í dag.