Kvennahlaup ÍSÍ fer fram á sunnudaginn. Markmið hlaupsins er að hvetja og styðja konur á öllum aldri til aukinnar heilsueflingar. Fyrsta Kvennahlaup ÍSÍ var haldið 30. júní árið 1990. Árlega taka um 16 þúsund konur þátt í hlaupinu á um 90 stöðum hérlendis og um 16 stöðum erlendis. 

Þar sem Smábæjaleikarnir fara fram á Blönduósi um helgina verður hlaupið á Blönduósi fært til um einn dag. Hlaupið verður frá Íþróttamiðstöðinni klukkan 18 mánudaginn 19. júní. Þátttakendur fá glaðning frá Ölgerðinni, Nivea og  Sjóvá auk þess  sem Blönduósbær býður þátttakendum frítt í sund að hlaupi loknu og Kjörbúðin gefur hlaupurum ávexti.

Á Hvammstanga fer hlaupið fram sunnudaginn 18. júní og hefst við Íþróttamiðstöðina klukkan 11. Sama dag verður hlaupið á Borðeyri klukkan 11 við Tangahúsið.

Þátttökugjald fyrir 12 ára og yngri er kr. 1.000 krónur og kr. 2.000 fyrir 13 ára og eldri. Innifalið er bolur og verðlaunapeningur.