FÓKUS hópurinn kemur fram á laugardaginn á Húnavökuhátíðinni en hann er skipaður fimm söngvurum sem kynntust í gegnum Voice Ísland 2017. Í hópnum eru tveir Húnvetningar, Hrafnhildur Ýr Víglundsdóttir og Sigurjón Örn Böðvarsson. Að auki eru í hópnum þau Karítas Harpa Davíðsdóttir, Eiríkur Þór Hafdal og Rósa Björg Ómarsdóttir. Hrafnhildur, Sigurjón, Rósa og Eiríkur ætla að skemmta Húnavökugestum á laugardaginn fyrir framan Félagsheimilið milli klukkan 14-16.  

Söngvarnir fimm kynntust í gegnum Voice Ísland. Þau urðu strax miklir vinir og segja að eitt það eftirminnilegasta við Voice ævintýrið sé einmitt vináttan sem myndaðist. Það var því einföld ákvörðun fyrir þau að byrja að syngja saman og hefur samstarf þeirra fengið góðar viðtökur. Verkefnin hrúgast nú inn til þeirra og skemmtilegar uppákomur.

Hópurinn tekur að sér ýmis tónlistartengd verkefni við öll möguleg og ómöguleg tækifæri s.s. afmæli, brúðkaup, jarðarfarir, árshátíðir, starfsmannapartý, tónleikar, bæjarhátíðir og svo framvegis. Hópurinn mun til dæmis skemmta á Unglistahátíðinni Eldi í Húnaþingi í næstu viku.

Fræðast má betur um hópinn á Facebook síðu hans.