Sex kórar keppa til úrslita í lokaþættinum í Kórum Íslands sem verður á dagskrá Stöðvar 2, í beinni útsendingu, í kvöld klukkan 19:10. Auk Karlakórs Bólstaðarhlíðarhrepps eru það Gospelkór Jóns Vídalíns, Kór Lindakirkju, Karlakórinn Esja, Vox Felix og Spectrum. Austur-Húnvetningar ætla að koma saman í Félagsheimilinu á Blönduósi og horfa saman á þáttinn. Mikil spenna og eftirvænting er á meðal íbúa sýslunnar.

Kórar Íslands er skemmtiþáttur sem hóf göngu sína á Stöð 2 í haust og er Friðrik Dór Jónsson kynnir þáttanna. Þættirnir eru í beinni útsendingu og sýndir á sunnudagskvöldum klukkan 19:10. Tuttugu kórar hafa tekið þátt og hafa þeir ýmist verið kosnir áfram í undanúrslit og/eða úrslit í símakosningu eða valdir af dómnefnd. Dómnefndina skipa tónlistarfólkið Kristjana Stefánsdóttir, Ari Bragi Kárason, og Bryndís Jakobsdóttir.

Þátttakan ekki sjálfgefin
Þátttaka Karlakórs Bólstaðarhlíðarhrepps í keppnina var ekki sjálfgefin því ekki var útlit fyrir að það næðist að safna liði í verkefnið. Meðlimir kórsins eru margir hverjir bændur og eins og gefur að skilja hafa þeir nóg að gera á haustin þegar fé er heimt af fjalli og sláturtíð hefst í kjölfarið. Allt leystist það þó farsællega og kórinn náði að undirbúa sig og skrá sig í keppnina.

Kórinn kom fram í keppninni í þriðja þættinum sem sýndur var í beinni útsendingu sunnudagskvöldið 8. október. Flutti hann lagið Í fjarlægð og stóð sig frábærlega, reyndar svo vel að þjóðin kaus hann áfram í símakosningunni sem þýddi að kórinn var kominn í undanúrslitin.

Seinna undanúrslitakvöldið fór fram síðastliðið sunnudagskvöld, 5. nóvember og var Karlakór Bólstaðarhlíðarhrepps á meðal keppenda. Kórinn söng lagið Gæfa hestamannsins eftir stjórnenda kórsins, Skarphéðinn Einarsson en texta gerði Benedikt Blöndal Lárusson. Dómnefndin var ánægð með flutninginn og lagavalið og það var einnig þjóðin því hún kórinn aftur áfram og nú inn í sjálfa úrslitakeppnina. Segja má að kórinn verði fulltrúi landsbyggðarinnar í úrslitakeppninni í kvöld því allir hinir kórarnir koma af höfuðborgarsvæðinu.

Andinn og stemningin er frábær
Í pistli Höskuldar B. Erlingssonar, formanns kórsins, sem lesa má hér á Húnahorninu, kemur fram að það sé ekki einfalt að taka þátt í svona uppákomum fyrir lítinn kór norðan af landi. Því fylgi mikill kostnaður sem erfitt sé að kljúfa. Því hafi kórmenn ferðast á einkabílum til og frá keppnisstað og enginn talið það eftir sér að gera það og tekið á sig allan kostnað.

Höskuldur segir einnig að þetta verkefni sé mikil lyftistöng fyrir kórinn og allir séu spenntir að taka þátt. Andinn og stemningin sé frábær. Þakkar hann öllum sem lagt hafa kórnum liði við þátttöku hans í keppninni, hvort sem það hafi verið gert með atkvæðum eða öðrum hætti. Hann hvetur svo alla að horfa á þáttinn í kvöld og kjósa kórinn ef flutningur hans verði mönnum að skapi. Kosninganúmer kórsins er 900-9002.