Lögð hefur verið fram á Alþingi þingsályktunartillaga um að samgöngu- og sveitarstjórnarráðherra verði falið að hefja undirbúning að endurnýjun vegarins yfir Kjöl sem heilsársvegar með einkaframkvæmd. Á ráðherra að gera forkönnun á umhverfisáhrifum og samfélagslegum og efnahagslegum áhrifum framkvæmdarinnar, m.a. á ferðaþjónustu, byggðaþróun og náttúruvernd. Samkvæmt tillögunni er stefnt því að undirbúningi framkvæmda ljúki fyrir 1. febrúar 2019 og framkvæmdir hefjist í beinu framhaldi.

Flutningsmenn tillögunnar eru sjálfstæðismennirnir Njáll Trausti Friðbertsson, Vilhjálmur Árnason og Haraldur Benediktsson. Í greinargerð með tillögunni segir m.a. að Norðvesturland hafi farið nokkuð halloka í atvinnu- og byggðamálum síðustu áratuga og þar hafi íbúum og störfum fækkað jafnt og þétt. Heilsársvegur yfir Kjöl mundi styrkja atvinnulíf í landshlutanum auk þess sem ferðaþjónusta gæti skipt grundvallarmáli þegar komi að því að viðhalda lágmarksþjónustu í litlum byggðarlögum þar sem íbúafjöldi standi ekki undir henni einn og sér.

Tillöguna ásamt greinargerð má sjá hér.