Blönduós iðaði af mannlífi um helgina enda fjölmennt í bænum í tengslum við Smábæjarleikana sem haldnir voru í fimmtánda sinn. Þátttakendur og aðstandendur þeirra voru um 700 á fótboltamótinu sem heppnaðist í alla staði vel. Keppendur lögðu sig alla fram og stóðu sig frábærlega og skipulag og framkvæmd mótsins var til fyrirmyndar. Blönduósingar og gestir þeirra fögnuðu svo í sameiningu þjóðhátíðardeginum í gær.

Keppendur og foreldrar fjölmenntu í Félagsheimilið á Blönduósi á laugardaginn en hlé var gert á Smábæjarleikunum á meðan leikur Íslands og Argentínu fór fram. Leikurinn var sýndur í bíósalnum og myndaðist mikil og skemmtileg stemning enda ærið tilefni til þar sem íslenska liðið stóð sig frábærlega. Um kvöldið var haldin kvöldskemmtun í íþróttahúsinu þar sem Emmsé Gauti skemmti og var stemningin ekki síðri þar.

Blönduósingar fjölmenntu í skrúðgöngu á 17. júní en fengið var frá SAH Afurðum og á skólalóð Blönduskóla þar sem hátíðar- og skemmtidagskrá fór fram í ágætu veðri.

Meðfylgjandi myndir frá hátíðarhöldunum voru teknar af Róberti Daníel Jónssyni og má sjá fleiri myndir frá honum á Facebook síðu Blönduósbæjar. Myndirnar frá Smábæjarleikunum eru fengnar af Facbook síð leikanna.