Lúxemborgska hýsingar- og gagnavinnsluþjónustan Etix Group hefur fjárfest í Borealis Data Centers sem rekur tvö gagnaver á Íslandi; á Blönduósi og á Fitjum í Njarðvík. Með fjárfestingunni er Etix komið með ráðandi hlut eða um 55% í BDC sem hefur formlega skipt um nafn og mun framvegis heita Etix Everywhere Borealis.

Björn Brynjúlfsson, framkvæmdastjóri Borealis Data Centers, staðfestir þetta við Markaðinn, viðskiptablað Fréttablaðsins í gær.

„Etix er að koma inn sem ráðandi hluthafi hjá okkur. Þetta er alþjóðlegt fyrirtæki með rekstur úti um allan heim sem mun styrkja uppbyggingu hér heima verulega,“ segir Björn. „Við erum á kafi í uppbygginu með þeim sem er smátt og smátt að taka á sig góða mynd,“ sagði Björn í samtali við Markaðinn.

BDC gangsetti nýlega gagnaverið á Blönduósi en áætlað er að uppbyggingu á aðstöðunni ljúki fyrir árslok. Saman hafa þessi gagnaver hýsingargetu fyrir 30 þúsund netþjóna en vegna mikillar eftirspurnar frá alþjóðlegum fyrirtækjum er öll hýsingin uppseld.