VÃða eru vegir illa farnir.
Fréttir | 01. nóvember 2018 - kl. 15:35
Sveitarstjórn Húnavatnshrepps skorar á samgönguyfirvöld að endurskoða samgönguáætlun 2019-2023 sem samgönguráðherra hefur lagt fram með þingsályktunartillögu á Alþingi. Í umsögn sveitarstjórnar til umhverfis- og samgöngunefndar Alþingis segir að greiðar samgöngur sem byggja á góðu vegakerfi séu nauðsynlegar forsendur fyrir uppbyggingu atvinnulífs og viðunandi afkomu heimila og fyrirtækja. „Flestir tengi- og héraðsvegir í Húnavatnssýslu uppfylla engan veginn þær kröfur og fer ástand þeirra versnandi ár frá ári vegna ónógs viðhalds. Óhætt er að fullyrða að oft á tíðum eru vegirnir hættulegir vegfarendum og ættu að merkjast sem slíkir,“ segir m.a. í umsögninni.
Í henni kemur fram að sveitarstjórn Húnavatnshrepps hafi orðið fyrir vonbrigðum að í áætluninni skuli hvergi vera minnst á vegabætur í sveitarfélaginu. Einu vegabæturnar fyrir Norðurlandi vestra sé smá vegakafli á Skagastrandarvegi sem áætlaður sé eftir 3-4 ár.
Þá segir í umsögninni að sveitarfélagið keyri skólabörn um 252 kílómetra dag hvern á alónýtum malarvegum og í ljósi þess sé afar mikilvægt að áhersla verði á að lagfæra skólaakstursleiðir innan Húnavatnshrepps fyrst og fremst. Jafnframt leggur sveitarfélagið mikla áherslu á að lagt verði bundið slitlag á Þingeyrarveg en um hann sé mikil umferð á sumrin enda fjölsóttur sögu- og ferðamannastaður á Þingeyrum. Ennfremur leggi sveitarstjórn þunga áherslu á að Svínvetningabraut, Reykjabraut og Auðkúluvegur verði lagðir bundnu slitlagi. Um fjölfarna vegi sé að ræða þar sem þeir séu varaleið vegakerfisins vegna tengingar við Norðurland.
Sjá má umsögn Húnavatnshrepps hér.