Fagráð Smávirkjanasjóðs Samtaka sveitarfélaga á Norðurlandi vestra hefur lokið mati á umsóknum sem bárust vegna styrkja til fyrstu skrefa í rannsóknum á mögulegum rennslisvirkjunum á Norðurlandi vestra. Alls bárust 17 umsóknir en tvær uppfylltu ekki sett skilyrði í reglum sjóðsins. Stjórn SSNV samþykkti nýverið tillögur fagráðsins um að styrkja tíu verkefni, þrjú í Skagafirði, fimm í Austur-Húnavatnssýslu og tvö í Vestur-Húnavatnssýslu.

Smávirkjanaverkefnið er áhersluverkefni Sóknaráætlunar Norðurlands vestra á árinu 2018 og er framhaldsverkefni áhersluverkefnis frá árinu 2017 þar sem gerð var úttekt á smávirkjanakostum í landshlutanum. Tilgangur Smávirkjanasjóðsins er að styrkja fyrstu skrefin í rannsóknum á mögulegum rennslisvirkjunum á Norðurlandi vestra sem eru undir 10 MW að stærð. Miðað er við yfirlit á mögulegum rennslisvirkjunum sem taldar eru upp í skýrslu Mannvits frá árinu 2018 sem heitir Frumúttekt á smávirkjanakostum á Norðurlandi vestra.

Þau verkefni sem ákveðið var að styrkja eru:

Í Skagafirði: Korná/Gljúfurá. Sellækur. Háleggsstaðaá.
Í Austur-Húnavatnssýslu: Kornsá. Giljá. Stekkjarlækur. Grjótá. Brunná.
Í Vestur-Húnavatnssýslu: Miðlunarlón á Þorgrímsstöðum. Illagilslækur.

Mótframlag umsækjenda er 100.000 krónur. Smávirkjanasjóður SSNV mun greiða allan annan kostnað af frumúttektinni. Á árinu 2019 er fyrirhugað að veita styrki úr sjóðnum til næsta skrefs, mats á virkjanlegu rennsli, frummati hönnunar og byggingarkostnaðar. Gert er ráð fyrir að úthlutun þess hluta verkefnisins verði auglýst um mitt ár 2019.

Tengd frétt:

Smávirkjanir á Norðurlandi vestra