Framtíðaruppbygging Þrístapa var kynnt á fundi sveitarstjórnar Húnavatnshrepps í gær en á fundinn mættu þau A. Agnes Gunnarsdóttir, ráðgjafi hjá Versus ehf. og Hringur Hafsteinsson, ráðgjafi hjá Gagarin. Farið var yfir viðskiptaáætlun og hugmyndir um sýningu við Þrístapa. Húnavatnshreppur hefur unnið að þessu metnaðarfulla verkefni að undanförnu en gert er ráð fyrir að tugir þúsunda gesta heimsæki staðinn í framtíðinni.

Þrístapar eru í alfaraleið við Hringveg 1 í Vatnsdal. Fornleifaskráning hefur farið fram á staðnum og eru enn fjórar minjar sýnilegar; aftökustaðurinn, minnismerki um síðustu aftökuna og tvær tóftir með vegghleðslum ásamt grjóthleðslu. Ákveðið hefur verið að stækka helgunarstað minjanna og um leið bæta aðgengi og upplýsingum til almennings með gerð sýningar um aðdraganda og afleiðingar morðsins á Natani Ketilssyni.

Sýningin mun þræða aðdragandann, aftökuna og eftirmálin, en einnig fjalla um glæpi og refsingar á Íslandi í gegnum tíðina. Að lokum verður fjallað um aftökur í heiminum í dag. Sýningin verður sett upp á um þriggja hektara svæði sem teygist frá þjóðveginum að Þrístöpum og aftur til baka. Áætlað er að hún kosti tæpar 82 milljónir króna án virðisaukaskatts.

Hægt er að kynna sér viðskiptaáætlunina hér og hugmyndina af sýningunni hér.