Skógræktarfélag Austur-Húnvetninga vill minna á að í dag milli klukkan 11-15 verður hægt að fella sitt eigið jólatré á Gunnfríðarstöðum. Verð á jólatrjám er 5.500 krónur og ýmsar tegundir í boði. Ekta skógarkaffi við varðeldinn en kakóið verður áfram í boði.

Sjá um meðhöndlun jólatrjáa á skog.is.

Njótið skógarmenningar með skógræktarfélaginu og hjálpið okkur að planta fleiri trjám með því að kaupa af okkur jólatré. Bindum kolefni með skógrækt og minkum sótsporið með því að versla í heimabyggð.

Að koma í jólaskóginn á Gunnfríðarstöðum er menningarupplifun sem áður var minna um að hægt væri að upplifa í Húnavatnssýslum en er orðið hluti af jólaundirbúning hjá mörgum í dag.

Skógræktarfélag Austur-Húnvetninga vill leggja sitt að mörkum við að gera sýsluna okkar að betri stað til að búa á í framtíðinni. Það gerum við t.d. með því að auka gróður og byggja upp jarðveg.

Oft höfum við hjá skógræktarfélaginu verið spurð um nytjar sem skógurinn gefur. Það hefur reynst erfitt að svara spurningunni játandi um miklar nytjar sem gefa mikla fjármuni í aðra hönd. En svarið leynist í grundvallaratriðunum: Skógræktarfélagið framleiðir hreint loft, ferskt vatn og gróðurmold. Aukaafurðir eru t.d. sala á jólatrjám til almennings, torgjólatrjám til sveitafélaga, ýmsar afurðir til fyrirtækja sem þurfa köngla og trjágreinar til að skapa frekari verðmæti. Þá er skógurinn mikið notaður til gönguferða og fræðslu fyrir almenning og skólanemendur. Byrjað er að nota timburafurðir úr Gunnfríðarstaðaskógi. Útbúum staura til merkinga leiða, látum saga niður timbur til að hafa meira skjól á sölusvæði jólatrjáa, smíðum bekki, notum viðinn sem eldivið og útvegum  Blönduskóla efni til smíða. Margir nýta sér sveppina og ylminn sem skógurinn gefur og hafa fagran fuglasöng í kaupbætir.

Á meðfylgjandi mynd má sjá hvernig skógræktarfélagið notar trjáviðinn eftir að trén hafa fengið að standa á Kirkjuhólnum á Blönduósi ár hvert. Bekkurinn stendur við Leikskólann Barnabæ.