Afmælisnefnd aldarafmælis sjálfstæðis og fullveldis Íslands hefur gefið út skýrslu þar sem finna má upplýsingar um framkvæmd afmælisársins og yfirlit yfir öll verkefni sem skráð voru á dagskrá afmælisins. Í skýrslunni er m.a. sagt frá merkingum sem settar voru upp í Leifsstöð þar sem tímamótunum voru gerð skil en það var samvinnuverkefni Isavia, Textílseturs Íslands og Prjónagleðinnar. Nemendur og starfsfólk Blönduskóla, Húnavallaskóla og Höfðaskóla prjónuðu stykki í fánalitunum sem nemendur Concordia háskólans í Kanada aðstoðuðu við að sauma saman í ljómandi fín teppi ásamt fleira góðu fólki. Teppin voru höfð til sýnis á Prjónagleðinni í júní í fyrra áður en þau fóru í Leifsstöð.

Afmælisnefndin styrkti Prjónagleðina til verkefnisins um eina milljón króna. Verkefninu var ætlað að auka þekkingu og innsýn grunnskólanemanna í söguna, samfélagið og fullveldishugtakið sem og að auka þekkingu á prjóni og mikilvægi þessa þjóðararfs í sögu landsins um leið og það er kynnt fyrir öllum þeim fjölda erlendra farþega sem fer um Leifsstöð.

Í skýrslunni er einnig sagt frá því að í tengslum við Prjónagleðina 2018 hafi Textílsetrið staðið fyrir samkeppni um fullveldispeysu. Markmiðið með samkeppninni var að draga fram samlíkingu á milli fortíðar og nútíðar í sögu lands og þjóðar með tilvísun til fullveldis Íslands. Afmælisnefnd veitti sigurvegara samkeppninnar viðurkenningu.

Þá er í skýrslunni minnst á Foldarskart sumarsýningu Heimilisiðnaðarsafnsins en safnið hefur boðið íslensku textíllistafólki að sýna og kynna list sína allt frá árinu 2003. Og auðvitað er minnst á Prjónagleðina á 100 ára fullveldi Íslands en hún samanstóð af námskeiðum, fyrirlestrum og sýningum. Markmið var, og er, að vekja áhuga og halda við þekkingu í prjónaskap.

Meðfylgandi mynd er fengin af vef Alþingis. Á henni er Einar K. Guðfinnsson formaður afmælisnefndar og Ragnheiður Jóna Ingimarsdóttir framkvæmdastjóri að afhenda forsætisráðherra skýrsluna. Frá vinstri: Ragnhildur Arnljótsdóttir, Katrín Jakobsdóttir, Einar K. Guðfinnsson og Ragnheiður Jóna Ingimarsdóttir.