Fréttir | 18. júlí 2019 - kl. 10:15
Húnavakan er hafin

Húnavaka, bæjar- og fjölskylduhátíð Blönduósinga er hafin og stendur yfir alla helgina. Dagskráin er fjölbreytt að vanda og ættu allir að geta fundið eitthvað við sitt hæfi. Fólk er hvatt til þessa að kynna sér hana vel en í henni er að finna nýja viðburði sem ekki hafa verið áður á Húnavöku eins og náttúruyoga, fjallahjólakennsla og danskennsla. Tvær glæsilegar tónlistaveislur verða haldnar um helgina, kvöldvaka með varðeldi og tveir stórdansleikir. Í dag ætla bæjarbúar að plokka og gera fínt í bænum.

Hægt er að kynna sér dagskrána hér og einnig á Facebook síðu Húnavöku.

Þeir sem mæta á Blönduós í dag geta í rólegheitunum skoðað fjölmörg setur og söfn á staðnum eins og Heimilisiðnaðarsafnið sem er einstakt á Íslandi, Minjastofuna og Vatnsdælu á refli sem eru í Kvennaskólanum eða kíkt á uppstoppaðan ísbjörn í Hafíssetrinu sem er í Hillebrantshúsinu í gamlabænum. Á Blönduósi er frábær aðstaða fyrir fólk að fara í sund. Svæðið við sundlaugina og grunnskólann er paradís krakkanna. Þar er ærslabelgur, sparkvöllur, hjólabretta rampar eða skate park, körfuboltavöllur, stór og mikill klifurkastali og aparóla. Í kvöld verður Blö Quiz spurningakeppni í Félagsheimilinu en það hefur árlegur viðburður Húnavöku undanfarin ár.

Stærstu viðburðirnir á morgun föstudag eru að valin fyrirtæki á staðnum bjóða gestum og gangandi í heimsókn og má þar nefna Vilko/Prima, Ístex og SAH Afurðir. Leikhópurinn Lotta sýnir Litlu hafmeyjuna á Káratúni og svo verða tvær veislur annað kvöld, ein matarveisla og ein tónlistarveisla. Matarveislan er kótelettukvöld í Eyvindarstofu. Boðið verður upp á þykkar og feitar kótelettur sérvaldar frá SAH afurðum. Tónlistarveislan fer fram í Fagrahvammi. Þeir tónlistarmenn sem koma fram eru Friðrik Dór Jónsson, Hildur Kristín Stefánsdóttir og Magni Ásgeirsson og um kvöldið spilar hljómsveitin Á móti sól í Félagsheimilinu.

Segja má að laugardagurinn sé stóri dagur Húnavökunnar. Stærstu viðburðir þann daginn eru Golfmót á Vatnahverfisvelli, Fjallahjólakennsla og stutt fjallahjólaferð fyrir alla fjölskylduna og Blönduhlaup USAH. Skotfélagið Markviss verður með opinn dag á skotsvæðinu og síðdegis fer fram mót til heiðurs Höskuldi B. Erlingssyni. Farin verður söguganga um gamla bæinn, danskennsla verður í íþróttahúsinu, markaðsstemning við Félagsheimilið, útsýnisflug, hestar á skólalóðinni – teymt undir börnum, dorgað við höfnina, náttúruyoga stund í Hrútey, náttúruperlu Blönduósinga og margt margt fleira.

Hápunktur laugardagsins er Kvöldskemmtun í Fagrahvammi. Þar verða umhverfisverðlaun Blönduósbæjar veitt, tónlistarveisla og varðeldur. Á kvöldvökunni koma fram Gunni Helga, Gunni Óla og Einar Ágúst úr Skítamóral, Daði Freyr og hinn eini sanni Helgi Björns. Hljómsveitin Skítamórall spilar svo á balli í Félagsheimilinu seinna um kvöldið.

Á sunnudaginn verður hin árlega Prjónaganga úr gamla bænum og að Kvennaskólanum. Sápurennibraut verður sett upp í kirkjubrekkunni og bókamarkaður verður á Héraðsbókasafninu þar sem Gunni Helga les upp úr bók sinni Barist í Barcelona.

Frábær skemmtun framundan á Blönduósi alla helgina.

Höf. rzg

Húnahornið - Fréttavefur allra Húnvetninga