Fréttir | 15. ágúst 2019 - kl. 11:45
Sauðfjárslátrun hófst á Hvammstanga 9. ágúst síðastliðinn og var slátrað 411 lömbum. Meðalvigtin var 15,1 kíló sem þykir mjög gott miðað við hve snemma var slátrað, að sögn Ágústs Andréssonar, forstöðumanns Kjötafurðastöðvar KS í samtali við Morgunblaðið í dag. Hann sagði að stefnt hefði verið að því að slátra 1.200 lömbum í dag en líklega verði þau ekki nema 600.
Ágúst segir að bændur séu frekar tregir til að senda fé til slátrunar og það líti ekkert of vel út með næstu vikur en ætlunin hafi verið að slátra í þrjá daga. Hann telur líklegast að bændum fyndist ekki borga sig að slátra lömbunum svo snemma. Þeir vilji heldur bíða og leyfa lömbunum að þyngjast enn meira, að því er segir Morgunblaðinu.
Kjötinu af nýslátruðu lömbunum úr fyrstu slátruninni var dreift í verslanir Bónus í gær.