Innlendur sem erlendir ferðamenn sem fara á söfn á Norðurlandi eru ánægðir með heimsóknir þangað. Þetta er niðurstaða nýrrar rannsóknar sem Rannsóknarmiðstöð ferðamála vann að beiðni Markaðsstofu Norðurlands, en niðurstöður hennar voru kynntar á ráðstefnu á Hótel Kea í dag.

Í könnuninni sögðust 97% svarenda annaðhvort vera ánægðir eða mjög ánægðir með heimsóknir á söfnin og 90% sögðust ætla mæla með því við fjölskyldu og vini að þeir gerðu slíkt hið sama. Í tilkynningu frá Markaðsstofu Norðurlands segir að niðurstöðurnar séu mjög ánægjulegar fyrir sögutengda ferðaþjónustu á Norðurlandi og raunar alla ferðaþjónustu, því góð upplifun ferðamanna sé auðvitað lykilatriði í allri þróun greinarinnar. Á meðal safna í könnuninni er Heimilisiðnaðarsafnið á Blönduósi og Byggðasafn Húnvetninga og Strandamanna.

Rannsóknir og ráðgjöf ferðaþjónustunnar vann einnig skýrslu fyrir Markaðsstofu Norðurlands, upp úr könnuninni Dear Visitors sem hefur verið unnið markvisst með frá árinu 2004. Þar kom fram að ferðamenn á Norðurlandi eru talsvert líklegri til að skoða söfn eða sýningar en hinn almenni ferðamaður á Íslandi, og því megi gera ráð fyrir því að slík afþreying dragi ferðamenn inn í landshlutann upp að nokkru marki. Ferðamenn á Norðurlandi eru sömuleiðis líklegri til þess að skoða kirkjur og fræga sögustaði.

Á ráðstefnunni í dag voru erindi frá Ingu Hlín Pálsdóttir um menningu og sögu í landkynningu á vegum Íslandsstofu, Aníta Elefsen safnstjóri Síldarminjasafnsins sagði frá reynslu af rekstri safnsins, Svanhildur Pálsdóttir kynnti starfsemi 1238:Battle of Iceland og Einar K. Jónsson sveitarstjóri Húnavatnshrepps kynnti áform um uppbyggingu við Þrístapa og sögutengda ferðaþjónustu þar.

Hér má skoða skýrslu RMF – Söguferðaþjónusta á Norðurlandi 2019
Hér má skoða skýrslu RRF – Norðurland 2018, erlendir ferðamenn, menningararfur og dýraskoðun