Þau heiðurshjón Sigurlaug Þóra Hermannsdóttir og Hlynur Tryggvason á Blönduósi komu heldur betur færandi hendi í Tónlistarskóla A-Hún. í dag er þau færðu skólanum klarinett að gjöf til minningar um Hönnu Lísu barnabarn þeirra.

Hanna Lísa stundaði nám við tónlistarskólann og lærði m.a. á blokkflautu, píanó, gítar og klarinett. „Um leið langar okkur að þakka skólanum og starfsmönnum hans frábært starf í þágu tónlistarmenningar í héraðinu“ sögðu þau Silla og Hlynur. „Við þökkum hjónunum kærlega fyrir fallega og höfðinglega gjöf. Minningin um yndislega stelpu og frábæran nemanda lifir í hjörtum okkar“ segir á heimasíðu skólans www.tonhun.is.