Katrín Jakobsdóttir, forsætisráðherra, Sigurður Ingi Jóhannsson, samgöngu- og sveitarstjórnarráðherra og Ásmundur Einar Daðason, félags- og barnamálaráðherra heimsóttu í gær fólk á Blönduósi og Hvammstanga sem staðið hefur í stafni í sinni heimabyggð síðustu daga. Ásmundur Einar fjallar um heimsóknirnar fundi á Facebook síðu sinni. Hann segir það ómetanlegt að eiga allt það öfluga fólk sem staðið hefur vaktina síðustu daga og fyrir það beri að þakka.

„En eitt er víst og það er að við munum aftur lenda í sambærilegu óveðri. Því er mikilvægt að við reynum nú einu sinni að læra af þessari reynslu og sú vinna sem ríkisstjórnin er búinn að setja af stað skili raunverulegum aðgerðum. Þessar aðgerðir verður að vinna í samvinnu við heimamenn en ekki eingöngu af þeim sem búsettir eru utan þessara svæða og skilja stöðuna eðlilega ekki nógu vel,“ segir Ásmundu Einar.

Þá segir hann að það verði að tryggja að öryggi íbúa og hagsmunir almennings vegi hærra en hagsmunir einstaka landeigenda þegar kemur að því að styrkja raforkuöryggi almennings. „Það er t.d. grafalvarlegt að það hefði verið hægt að koma í veg fyrir hluta af rafmagnsleysinu í Vestur-Húnavatnssýslu ef ekki hefði verið fyrir einn eiganda lands sem neitaði að fallast á að línan yrði sett í jörðu. Þessi stutti kafli gaf sig síðan í óveðrinu m.a. með þeim afleiðingum að ungt fólk með börn niður í nokkurra mánaða var án rafmagns og fjarskipta. Það varðar við almannahagsmuni og þjóðaröryggi að hið opinbera geti tryggt íbúum sínum þessar grunnþarfir.“

Sjá nánar Facebook síðu Ásmundar Einars.