Fréttir | 13. febrúar 2020 - kl. 15:40
Allt skólahald í Húnavatnssýslum fellur niður á morgun, föstudaginn 14. febrúar vegna slæmrar veðurspár. Íþróttahúsið og sundlaugar verða einnig lokaðar. Vegagerðin hefur birt yfirlit yfir þá vegi sem eru á óvissustigi vegna veðursins sem er á leiðinni. Á Norðurlandi vestra má búast að veginum um Holtavörðuheiði verði lokað frá klukkan 04:00 í fyrramálið. Búast má við að veginum um Vatnsskarð verði lokað frá klukkan 04:00 í fyrramálið og að lokunin standi til 07:00 15. febrúar.
Ríkislögreglustjóri hefur lýsir yfir óvissustigi almannavarna fyrir allt landið vegna austan aftakaveðurs á morgun. Ákvörðunin er tekin í samráði við alla lögreglustjóra landsins og í samræmi við veðurspá Veðurstofu Íslands, sem spáir aftakaveðri með appelsínugulum veðurviðvörunum um allt land.
Óvissustigi er lýst yfir þegar grunur vaknar um að eitthvað geti gerst af náttúru- eða mannavöldum, sem á síðari stigum gæti leitt til þess að heilsu og öryggi fólks, umhverfis eða byggðar er ógnað. Samráð á milli almannavarna og þeirra stofnana sem málið varðar er aukið.
Sérlega djúp lægð gengur yfir landið og mun hún fyrst hafa áhrif á sunnanverðu landinu aðfaranótt föstudags, en síðan um allt land er líða fer á morguninn og fram eftir degi. Búast má við víðtækum samgöngutruflunum á landinu og ekkert ferðaveður er á meðan viðvörunin er í gildi.