Brunavarnir Austur-Húnvetninga eru fluttar í nýtt húsnæði að Efstubraut 2 á Blönduósi. Formleg afhending fór fram síðastliðinn föstudag og að því tilefni kom hluti slökkviliðsmanna saman og skoðaði húsnæðið. Í ljósi aðstæðna var ekki hægt að boða til viðburðar þannig að gestir gætu skoðað húsnæðið en það verður vonandi gert síðar. Í nýja húsnæðinu verður hægt að hafa allar bifreiðar og búnað liðsins undir sama þaki, auk þess sem hægt verður að útbúa ýmsa nauðsynlega aðstöðu.

Ingvar Sigurðsson slökkviliðsstjóri ritar pistil á Facebook síðu Brunavarna Austur-Húnvetninga í tilefni af formlegri afhendingu húsnæðisins. Hann segir að unnið sé að því að klára hugmyndir að skipulagi þess sem verði síðan sett í lokahönnun svo hægt verði að hefja framkvæmdir við breytingar í takt við þarfir slökkviliðsins. Bæta þurfi við iðnaðarhurðum og útbúa ýmis aðstöðurými.

„Bætt aðstaða slökkviliða, bæði til viðbragða, þjálfunar og fræðslu er fyrsta skrefið í þá átt að stór bæta brunavarnir. Slökkviliðið hefur búið við þröngan kost á núverandi slökkvistöð liðsins að Norðurlandsvegi 2 en það húsnæði var byggt 1975 og einungis 223 fm. Má því segja að langþráð og þörf uppbygging aðstöðu liðsins sé í augnsýn. Slökkviliðið hefur ekki haft nægt rými eða aðstöðu sem skyldi til að sinna þjálfun og þeim fjölbreyttu verkefnum sem liðið þarf að sinna. Leigja hefur þurft auka húsnæði síðastliðin ár fyrir tankbíl liðsins vegna plássleysis en það er mjög slæmt gagnvart viðbragðstíma liðsins í útköllum. Í nýju húsnæði verður því hægt að hafa allar bifreiðar og búnað liðsins undir sama þaki, ásamt því að útbúa kennsluaðstöðu, búningsklefa, sauna afeitrunarklefi, þvottaaðstöðu, skrifstofur, stjórnstöð og ýmis aðstöðurými. Með auknu rými verður möguleiki á að reyna að halda aðskilnaði milli hreinna og óhreinna rýma, sérstaklega ljósi baráttu gegn aukinni tíðni krabbameins hjá slökkviliðsmönnum,“ segir Ingvar í pistli sínum.

Hann óskar íbúum Blönduósbæjar og Húnavatnshrepps til hamingju með húsnæðið og einnig sveitarstjórnum sveitarfélaganna fyrir að standa dyggilega að baki mikilvægri uppbyggingu í brunavörnum.

Efstabraut 2 var áður í eigu Léttitækni ehf. og er húsnæðið 486 fermetrar að stærð. Kaupverðið var 62 milljónir króna.