Nöldrið | 25. maí 2020 - kl. 09:30
Vorverkin stór og smá

Þau taka tímann vorverkin og undanfarið hefur viðrað vel til vinnu í görðum bæjarbúa, enda hafa þeir heldur betur tekið til hendinni og snyrt og fegrað kringum hús sín. Þær eru ófáar kerrurnar og vörubílarnir sem maður hefur séð aka heilum hlössum af garðaúrgangi til förgunar og spurning hvort ekki sé hægt að nýta eitthvað af þessu efni út görðum bæjarbúa sem mér skilst að sé allt urðað. Okkur bæjarbúum er gert skylt að flokka sorpið okkar og því þá ekki að krefjast þess sama af bænum að garðaúrgangur sé flokkaður og stór tré kurluð og kurlið nýtt.

Það hefur verið miklu fargað af stórum trjám á þessu vori. Bæði var það að mikið af trjágróðri brotnaði eða skemmdist í óveðrum vetrarins og eins hefur áhugi og smekkur garðeigenda minnkað fyrir 4-5 metra háum öspum og grenitrjám heima við hús. Við megum samt ekki gleyma því að þessi tré sem sett voru niður fyrir 30-40 árum hafa aukið á veðursæld og gert hverfið í götunum upp af íþróttavellinum hlýlegra og skjólbetra því þarna var jú bara blásinn melur þegar frumbyggjarnir mættu með haka og skóflur, að ég tel fyrst á Hóla- og Melabraut. Ég vona að eitthvað af trjám fái áfram að skýla íbúum „uppi í hverfi" svo það sé áfram álitlegur kostur til búsetu.

Það er algjörlega óþolandi og óásættanlegt hvernig forsvarsmenn Framkvæmdasjóðs ferðamannastaða litu fram hjá Norðurlandi vestra við úthlutun til uppbyggingar ferðamannastaða í landshlutanum. Um leið og þeir úthluta Norðurlandi eystra 340 milljónum fær norðurland vestra 34 milljónir. Vesturlandi er úthlutað 219 milljónum, Vestfjörðum 140 og Austurlandi 115 milljónum. Þetta eru þær tölur sem birtar voru í fjölmiðlum þegar þessum milljónum var úthlutað og svo bætti þessi sami sjóður um betur og dró fram 200 milljónir til viðbótar, en ekki kom króna af því fé í hlut Norðurlands vestra. Það er erfitt að sætta sig við að vera hafður svona útundan og fróðlegt væri að vita hver ástæðan er.

Ég hef tekið eftir því að ferðaþjónustufyrirtæki og sveitarstjórnir víða um land eru tekin til við að auglýsa það sem þeirra landshluti hefur upp á að bjóða í þeirri von að íslenskir ferðamenn stoppi við og njóti þess sem í boði er. Ég rakst á dögunum á bráðskemmtilegar auglýsingar á Instragram frá Stykkishólmsbæ. Kannski er ódýrara að auglýsa á Instragram en ýmsum öðrum miðlum og þá er sjálfsagt að nota sér það, en víst er að við verðum að minna á okkur.

Á meðan bæði Prjónagleðin og Smábæjarleikarnir eru blásnir af eigum við að fá okkar Húnavöku, þó gleðin verði kannski með öðru sniði en við erum vön. Ég veit að það eru margir sem fagna því að Húnavakan verður í sumar og gleðst ég yfir endurkomu viðburðarstjóra vökunnar en þar kemur vanur maður (kona) sem þekki sitt heimafólk.

Það þótti mörgum vel í lagt þegar fréttir bárust um sumargjafir Samherjamanna til barna sinna að andvirði 60 þúsund milljón króna. Að einhverjir tveir menn geti ráðskast svona með fiskistofna þjóðarinnar er auðvitað út í hött. Þeir ungu menn sem á sínum tíma stofnuðu Samherja voru sannarlega duglegir menn sem nýttu sér þá þjóðargjöf sem samþykkt var af Alþingi og virðist ógjörningur eða enginn vilji til að breyta og sýnir vanmátt eða dugleysi þeirra þingmanna sem ættu fyrir löngu að vera búnir að stöðva svona rugl.

Hvort sem við ætlum að ferðast eða veljum að vera heima í sumar vona ég að allir njóti hins íslenska sumars með sínum sólargeislum nú eða rigningu, roki eða logni og öllu þar á milli. Við klæðum okkur eftir veðri, nóg er nú til af útvistarfatnaði, við framleiðum jú besta útivistarfatnað í heimi eða hvað og hann er gott að nota á Íslandi. Með ósk um gleðilegt sumar fyrir alla landsmenn kveð ég að sinni.

Nöldri.

Höf. Nöldri

Húnahornið - Fréttavefur allra Húnvetninga