Um síðustu helgi fór Meistaramót Íslands 11-14 ára fram á Sauðárkróksvelli en þangað mættu um 230 ungmenni frá 17 félögum víðsvegar um landið. Fimm krakkar tóku þátt frá Kormáki í Húnaþingi vestra og níu krakkar, fjórir frá Hvöt á Blönduósi og fimm frá Fram á Skagaströnd, kepptu undir merkjum Ungmennasambands Austur-Húnvetninga.

Á Facebook síðunni Frjálsar íþróttir í Húnaþingi er sagt frá árangri krakkanna frá Kormáki. Victoría Elma Vignisdóttir varð Íslandsmeistari í spjótkasti, hafnaði í 11.-13. sæti í hástökki og í 19. sæti í kúluvarpi. Saga Ísey hafnaði í 5. sæti í hástökki, 7. sæti í kúluvarpi, 9. sæti í 60 m hlaupi og 10. sæti í spjótkasti.

Þær Linda Fanney Sigurbjartsdóttir, sem var að taka þátt í sínu fyrsta frjálsíþróttamóti og Silja Sigurósk Reimarsdóttir sem var að taka þátt í sínu fyrsta utanhúss móti stóðu sig einnig mjög vel. Hafnaði Linda í 15. sæti í langstökki, 16. sæti í kúluvarpi og 19. sæti í 60 m hlaupi og Silja meðal annars í 15. sæti í spjótkastinu. En fjöldi þátttakenda í greinunum var allt að 41 stúlka. Stúlkurnar fjórar tóku síðan þátt í boðhlaupskeppninni og enduðu þar í 5. sæti.

Bragi Hólmar Guðmundsson varð annar í langstökki og 600 m hlaupi og þriðji í 60 m hlaupi. Þá hafnaði hann í 4. sæti í spjótkasti og 8.sæti í hástökki. Í stigakeppninni höfnuðu Kormáks stúlkurnar í flokki 12 ára í 5. sæti og í flokki 11 ára pilta hafnaði Kormákur í 3.sæti.

Á Facebook síðu Fram á Skagaströnd er sagt frá árangri krakkanna þaðan. Birgitta Rún Finnbogadóttir 12 ára keppti í 60 metrum, langstökki, kúluvarpi og spjótkasti. Hún komst í úrslit í 60 m og hafnaði í 11. sæti á tímanum 9,12. Í langstökki hafnaði hún í 9. sæti á 4,06m. Í kúluvarpi kastaði hún 6,97 og hafnaði í 14. sæti. Í spjótkasti náði hún 17,09m og endaði í 6. sæti þar.

Sóley Sif Jónsdóttir keppti í 13 ára flokki og tók þátt í 100m hlaupi, hástökki, langstökki, kúluvarpi og spjótkasti. 100 metrana renndi hún á 15,59s og bætti sig um tæpa sekúndu. Í hástökki fór hún yfir 1,16 og bætti sig um 6sm. Í langstökki sveif hún 3,63 og bætti eigið met um 14sm. Í spjótkasti varpaði hún spjótinu 14,52m en enginn fyrri árangur var skráður svo það er nýtt persónulegt met.

Sólveig Erla Baldvinsdóttir í flokki 14 ára keppti í 100m hlaupi, 600m hlaupi, Hástökki og Langstökki. Sólveig hljóp 100 metrana á 15,42 sem er bæting um níu sekúndubr., 600 metrana fór hún á 2:15,83 sem er persónulegt met. Í hástökki fór Sólveig yfir 1,21m sem er nokkuð undir því besta sem Sólveig hefur sýnt. Í langstökki fór hún 3,9m og var það einnig nokkur frá hennar besta.

Logi Hrannar Jóhannsson í flokki 12 ára keppti í 60metra hlaupi og renndi völlinn á 9,76 sem er bæting uppá 69 sekúdubr., hann hafnaði í 9. sæti. Í hástökki bætti hann sig um 13sm og fór yfir 1,16m og deildi 6-7.sæti. Í langstökki bætti hann sig enn og aftur, í þetta sinn um 12sm og flaug 3,67m, hafnaði í 8. sæti.

Valdimar Viggó Baldursson keppti í flokki 13 ára og tók þátt í 100m hlaupi, hástökki, langstökki, kúluvarpi og spjótkasti. Valdimar bætti sig um 4 sekúndur í hlaupinu og hljóp á 15,14 sek. Í hástökki var hann undir sínum besta árangri og fór yfir 1,21 en felldi 1,31. Í langstökki bætti Valdimar Viggó sig og flaug 3,40m en það er bæting uppá 47sm. Í kúluvarpi kastaði hann 8,64 sem er bæting uppá 2,57m, sem fleytti honum í úrslit en þar náði hann ekki að bæta við sig og féll úr 4. sæti niður í það 5. þegar yfir lauk. Í spjótkasti bætti hann sig einnig, í þetta sinn um eina átta metra (18,64m) en það fleytti honum í 11. sæti.

Frá Hvöt komu fjórir krakkar. Á Facebook síðu Frjálsíþróttadeildar Hvatar er sagt frá árangri þeirra. Í flokki 11 ára stúlkna keppti Harpa Katrín Sigurðardóttir, er þetta hennar fyrsta stórmót. Hún vann silfur í spjótkasti þegar hún kastaði spjótinu 17,94m en alls voru 25 keppendur. Í 60m hlaupi var hún þriðja inn í úrslit af 33 stúlkum á tímanum 9,34 sek en endaði í 5. sæti eftir úrslitahlaupið. Í hástökki stökk hún 1.16m, varð í 9 sæti af 19 stúlkum. Í langstökki stökk hún 3.76m, varð í 8 sæti af 32 stúlkum. Í kúluvarpi varpaði hún 6,44m og endaði í 6 sæti af 29 stúlkum.

Í flokki 11 ára drengja keppti Ari Ingvarsson, er þetta einnig hans fyrsta stórmót. Hann varpaði kúlunni 6.20m og varð í 14 sæti af 22 drengjum og kastaði spjótinu 17.98m og varð í 6.sæti af 17 drengjum.

Í flokki 14 ára stúlkna kepptu Aðalheiður Ingvarsdóttir og Unnur Borg Ólafsdóttir. Aðalheiður Ingvarsdóttir varði Íslandsmeistaratitilinn sinn þegar hún kastaði spjótinu 30.66m og kastaði kúlunni 7.10m.

Unnur Borg Ólafsdóttir vann þrenn bronsverðlaun á mótinu. Í 100m hlaupi varð hún fimmta inn í úrslit á tímanum 13,95 en endaði í 8.sæti í úrslitahlaupinu. Í 80m grind varð hún í 3.sæti á tímanum 13,73 sek. Í langstökki varð hún í 3.sæti er hún stökk 4,73m og í spjótkasti varð hún einnig í 3.sæti með kast upp á 27.35m.