Kolfinna Kristínardóttir hefur verið ráðin í starf atvinnuráðgjafa með áherslu á nýsköpun hjá Samtökum sveitarfélaga á Norðurlandi vestra. Alls bárust 34 umsóknir um starfið sem auglýst var í maí síðastliðnum. Kolfinna hefur MA-próf í hagnýtri menningarmiðlun og BS-próf í ferðamálafræði, bæði frá Háskóla Íslands. Starfsstöð hennar verður á Sauðárkróki.

Hún setti upp Matarhátíð í Skagafirði í tengslum við meistaraverkefni sitt þar sem áhersla var lögð á nýsköpun í matarmenningu og kynningu á skagfirsku hráefni og framleiðslu. Kolfinna hefur stjórnenda- og rekstrarreynslu úr störfum sínum hjá Wow Air auk þess sem hún hefur sinnt stjórnunarstörfum í ferðaþjónustu. Kolfinna hefur störf 1. september næstkomandi.

Í tilkynningu frá SSNV segir: "Með ráðningu atvinnuráðgjafa með nýsköpun með sérsvið er verið að auka áherslu á þennan mikilvæga þátt til aukinnar verðmætasköpunar í landshlutanum. Er það í takt við áherslur í Sóknaráætlun Norðurlands vestra fyrir árin 2020-2024. Í áætluninni er meðal annars lögð áhersla á fullvinnslu afurða sem framleiddar eru á svæðinu, fjölgun vaxtarbrodda sem og styrkingu grunnstoða í atvinnulífinu, svo sem í ferðaþjónustu, landbúnaði og sjávarútvegi."

Sagt er frá ráðningunni í fundargerð stjórnar SSNV frá 3. júlí síðastliðnum sem birt er á vef samtakanna í dag. Í henni kemur einnig fram að öllum umsóknum um starf við bókhald og almenn skrifstofustörf, sem auglýst var laust til umsóknar í maí, hafi verið hafnað og ákveðið að auglýsa starfið að nýju þegar fjárhagsáætlun ársins 2021 hefur verið samþykkt. Ástæðan er sú að starfssvið viðkomandi starfsmanns hafi verið útvíkkað og hefur framkvæmdastjóra verið falið að útfæra breytinguna nánar. Alls sóttu 36 um starfið eftir að það var auglýst.

Fréttin hefur verið uppfærð