Fulltrúar Sveitarfélagsins Skagastrandar í sameiningarnefnd sveitarfélaganna í Austur-Húnavatnssýslu telja að komi til sameiningar eigi öll stjórnsýsla sameinaðs sveitarfélags að vera til frambúðar á Skagaströnd. Vel heppnað fordæmi fyrir slíku fyrirkomulagi megi finna í Snæfellsbæ. Þar sé öll stjórnsýsla sveitarfélagsins á Hellisandi þrátt fyrir að Ólafsvík sé stærsti þéttbýliskjarninn.

Þetta kemur fram í bókun fulltrúanna á fundi sameiningarnefndarinnar 30. september síðastliðinn þegar stjórnskipulag sameinaðs sveitarfélags var til umræðu. Í bókuninni segir jafnframt að slíkt fyrirkomulag auki líkur á að sameining yrði samþykkt af íbúum Skagastrandar þar sem hluti af andstöðu við sameiningu tengist ótta við að öll störf og þjónusta endi í stærsta íbúakjarna sameinaðs sveitarfélags og fátt muni sitja eftir í heimabyggð.

„Íbúar Austur-Húnavatnssýslu hafa lengst af sótt stóran hluta af þjónustu sinni til Blönduósbæjar. Má þar nefna þjónustu sýslumanns, ÁTVR, bifreiðaskoðun, heilbrigðisþjónustu sem og almenna verslunarþjónustu. Ekki er fyrirséð að það fyrirkomulag muni breytast. Því er mikilvægt að viðhalda þjónustustigi og uppbyggingu utan stærsta byggðakjarnans og sýna íbúum fram á það í verki að markmið með sameiningu sé efling Austur-Húnavatnssýslu í heild sinni,“ segir í bókuninni.

Í máli fulltrúa Húnavatnshrepps og Blönduósbæjar kom fram á fundinum að eðlilegt væri að stjórnsýsla nýs sveitarfélags yrði staðsett bæði á Skagaströnd og Blönduósi og ef sveitarstjórnir samþykki að hefja formlegar sameiningarviðræður yrði stjórnskipulag útfært nánar og samráð haft við íbúa.

Stjórnskipulag og stöðugreining stjórnsýslu
Á fundinum 30. september var farið yfir stjórnskipulag og stöðugreiningu stjórnsýslu sem var líka til umfjöllunar á fundi sameiningarnefndar 10. júní síðastliðinn. Stöðugreiningin ásamt greiningu á styrkleikum, veikleikum, ógnunum og tækifærum var notuð til að setja fram áhersluatriði í stjórnsýslu og þjónustu ef til sameiningar sveitarfélaganna kemur.

Áhersluatriði nefndarinnar, ef til sameiningar sveitarfélaganna kemur, eru m.a. skilvirk og fagleg stjórnsýsla, gott aðgengi að stjórnsýslunni, bæði á skrifstofu og rafrænt, að starfsstöðvar verði á Blönduósi og Skagaströnd, aukin þjónusta við íbúa og atvinnulíf og að störf í stjórnsýslu fækki ekki endilega. Einnig leggur nefndin til að sveitarstjórn hafi 7-9 fulltrúa og að skoðað verði að hafa fleiri fulltrúa í upphafi sameiningar sem gæti fækkað eftir eitt til tvö kjörtímabil. Lagt er til að nefndakerfi verði hefðbundið með öflugum fagnefndum sem vinni að hagsmunum alls svæðisins og að nýttir verði möguleikar til að setja upp verkefnabundnar nefndir sem starfi að tímabundnum afmörkuðum verkefnum, s.s. atvinnu og byggðamálum. Þá er lagt til að samráð við íbúa verði m.a. í vel skilgreindum notendaráðum, svo sem ungmennaráði, öldungaráði og þjónusturáðum.