Samkvæmt bráðabirgðatölum Hafrannsóknarstofnunar fyrir stangveiði á laxi í sumar jókst veiðin um 46% milli ára. Heildarfjöldi stangveiddra laxa árið 2020 var um 42.800 fiskar en var 29.300 í fyrra. Aukning varð í veiði í öllum landshlutum nema á Norðurlandi eystra og mest varð aukningin á Suðurlandi. Veiðin í sumar var nærri meðallaxveiði frá árinu 1974. Umtalsverð aukning var í laxveiði í ám sem byggja veiði á sleppingum gönguseiða en veiði villtra laxa var sú sjötta minnsta frá því farið var að skrá í rafrænan gagnagrunn.

Laxveiðitímabilinu er nú lokið í flestum ám landsins. Enn er þó veitt í ám þar sem uppistaðan í veiðinni er lax úr sleppingum gönguseiða, en þar stendur veiði til 20. október. Í tölum Hafrannsóknarstofnunar um heildarlaxveiði eru taldir villtir laxar, laxar sem upprunnir eru úr sleppingum gönguseiða og einnig þeir laxar sem er sleppt aftur í stangveiði (veitt og sleppt).

Umtalsverð aukning varð í laxveiði í ám sem byggja veiði á sleppingum gönguseiða og var veiðin í þeim ám alls um 14.200 laxar og munar þar mest um að metveiði var í Eystri-Rangá þar sem um 8.600 laxar hafa veiðst en veiði í hafbeitaránum er ekki lokið.

Laxar úr gönguseiðasleppingum eru viðbót við náttúrulega framleiðslu ánna og þegar veitt er og sleppt í stangveiði veiðast sumir fiskar oftar en einu sinni. Þegar litið er til veiða á villtum laxi eingöngu (ekki úr seiðasleppingum), að teknu tilliti til endurveiddra laxa, er heildarstangveiði villtra laxa árið 2020 um 23.500 laxar, sem er sjötta minnsta stangveiði villtra laxa frá því farið var að skrá veiði í rafrænan gagnagrunn.

Samkvæmt tölum Landssambands veiðifélaga yfir 75 aflahæstu laxveiði ár landsins veiddust 4.394 laxar í sjö helstu laxveiðiánum í Húnavatnssýslum og er það 22 löxum færra en í fyrra þegar 4.416 laxar veiddust. Mest var laxveiðin í Miðfjarðará af húnvetnsku ánum, 1.725 laxar sem er fjölgun um 119 frá fyrra ári. Miðfjarðará er jafnframt efst á lista þeirra vatnakerfa sem byggja veiði ekki alfarið á seiðasleppingum.