Fréttir | 19. október 2020 - kl. 15:00
Samkvæmt tilkynningu frá aðgerðastjórn almannavarna á Norðurlandi vestra eru engin smit skráð á svæðinu og enginn er í sóttkví. „Hún er einstaklega ánægjuleg taflan okkar í dag. Höldum vöku okkar, sinnum okkar persónulegu sóttvörnum og saman komumst við í gegnum þetta,“ segir í tilkynningunni. Alls greindust 42 ný kórónuveirusmit innanlands í gær. Af þeim voru 74% í sóttkví en ellefu utan sóttkvíar.
Á höfuðborgarsvæðinu eru 1.075 í einangrun og 2.341 í sóttkví. Á Austurlandi er enginn í einangrun, þar eru fjórir í sóttkví. Á Suðurnesjum eru 54 smitaðir og 261 í sóttkví. Á Suðurlandi eru 50 í einangrun og 51 í sóttkví. Á Norðurlandi eystra eru 26 í einangrun og 168 í sóttkví. Á Vestfjörðum eru sex í einangrun og einn í sóttkví. Á Vesturlandi eru 16 smitaðir og 17 í sóttkví. Óstaðsettir eru sjö smitaðir og 35 í sóttkví.
Á morgun tekur í gildi ný reglugerð um sóttvarnaráðstafanir. Við smíði hennar voru höfð að leiðarljósi þau meginsjónarmið sóttvarnaráðstafana að gætt sé því að fólk haldi fjarlægð sín á milli, komi ekki saman í stórum hópum og deili ekki sameiginlegum snertiflötum nema þeir séu sótthreinsaðir á milli einstaklinga. Jafnframt eru lýðheilsusjónarmið lögð til grundvallar með áherslu á að sem flestir geti stundað íþróttir og heilsurækt í einhverjum mæli.
Sjá tilkynningu frá heilbrigðisráðherra hér.