Kórónuveirufaraldurinn hefur haft veruleg áhrif á rekstur Húnaþings vestra, með tekjutapi og auknum kostnaði. Fram til þessa dags eru neikvæð áhrif vegna farsóttarinnar 88,3 milljónir króna og vegur þar þyngst þeir sex dagar sem öllu var lokað í sveitarfélaginu. Þetta kemur fram í bókun fundar byggðarráðs Húnaþings vestra frá því í gær. Áhrifanna gætir víða í sveitarfélaginu, sér í lagi hjá fyrirtækjum í ferðaþjónustu, tengdum greinum og ýmiskonar þjónustustarfsemi sem sætt hefur takmörkunum og lokunum á árinu.

Í bókuninni kemur fram að frá 21. mars til og með 27. mars síðastliðinni voru allir íbúar sveitarfélagsins látnir sæta úrvinnslusóttkví, sem var tímabundin ráðstöfun meðan unnið var að smitrakningu. Í henni fólst að einungis einn aðili af hverju heimili gat í hvert sinn yfirgefið heimilið til að afla aðfanga. Úrvinnslusóttkvíin gilti ekki um lífsnauðsynlega starfsemi, s.s. hjúkrunarheimili, sjúkrahús og verslun með matvæli og eldsneyti. Öll önnur starfsemi lá því niðri á þessum tíma.  Kostnaður sem sveitarfélagið varð fyrir meðan á úrvinnslusóttkví stóð eru 14,6 milljónir króna, útlagður kostnaður og tekjutap.

Einnig kemur fram í bókuninni að í lok júní var atvinnuleysi í Húnaþingi vestra 5%, er spáð 5,8% í lok árs 2020 og hefur ekki verið meira síðan í upphafi árs 2010. Byggðarráð lýsir áhyggjum sínum yfir vaxandi atvinnuleysi í Húnaþingi vestra og kallar eftir auknum stuðningi við nýsköpun, atvinnuuppbyggingu og fjölgun opinberra starfa í sveitarfélaginu.

Ríkisvaldið hvatt til að grípa til aðgerða
Byggðarráð lýsir jafnframt áhyggjum sínum af miklum kostnaði og tekjutapi sem sveitarfélagið hefur orðið fyrir á árinu vegna áhrifa COVID-19, sérstaklega hvað varðar kostnað vegna úrvinnslusóttkvíar.  Ráðið hvetur ríkisvaldið að grípa til sértækra aðgerða fyrir sveitarfélög sem sætt hafa úrvinnslusóttkví. Þá kallar byggðarráðið eftir auknu fjárframlagi til Jöfnunarsjóðs sveitarfélaga til að mæta skertum framlögum sjóðsins og því tekjutapi sem sveitarfélög í landinu hafa orðið fyrir vegna  COVID-19.