F.v.: Pétur Ingi Björnsson, Sigurður Pálsson og Kristinn Elvar Arnarsson. Mynd: Aðsend.
Fréttir | 26. febrúar 2021 - kl. 11:26
Upplýsingatæknifélögin Fjölnet og PREMIS hafa sameinast. Sérsvið félagana er rekstur tölvukerfa, alrekstursþjónusta og hýsing. Auk þess sinna félögin fjölbreyttri þjónustu á sviði upplýsingatækni. Áætluð velta sameiginlegs félags á árinu 2021 er á annan milljarð. Við viðskiptin verða Sigurður Pálsson og Pétur Ingi Björnsson, eigendur Fjölnets, starfandi hluthafar PREMIS, að því er fram kemur í tilkynningu. Félögin munu starfa undir nafni PREMIS með starfsstöðvar á Sauðárkróki og í Reykjavík.
„Það er mikil samlegð með rekstri þessara félaga og í krafti aukinnar stærðar munum við geta boðið enn betri þjónustu og aukið lausnaframboð á frábærum verðum. Við náum einnig að mæta aukinni kröfu um öryggisfjarlægðir með hýsingu gagna bæði í Reykjavík og á Sauðárkróki. Fjölnet eykur okkar þekkingu og á sama tíma vonumst við til að geta boðið enn betri þjónustu á Norðurlandi með þessari sameiningu“, segir Kristinn Elvar Arnarson forstjóri PREMIS.
„Við sjáum mikil tækifæri í þessari sameiningu og hlökkum til að kynna viðskiptavinum aukið lausnaval sem við getum nú boðið upp á. Einnig er mikilvægt fyrir okkur að með þessu styrkjum við hýsingarsal okkar á Sauðárkróki og er ánægjulegt að geta aukið uppbyggingu á sviði upplýsingatækni á Norðurlandi“, segir Sigurður Pálsson framkvæmdastjóri Fjölnets.
Sameiginlegt félag er með ríflega 50 starfsmenn.