Undirrituð hefur nú gegnt embætti sóknaprests í Þingeyraklaustursprestakalli í eitt ár og átta mánuði eða  frá 1. september 2019. Ég var ráðin til að leysa séra Sveinbjörn, sóknaprestinn ykkar, af í námsleyfi hans. Síðan hefur ráðningin verið framlengd nokkrum sinnum vegna veikinda séra Sveinbjörns. Núverandi skipun gildir til 1. september 2021. Ég þakka ykkur öllum góð og sérstaklega ánægjuleg samskipti það sem af er skipunartímans.

Almennt safnaðarstarf og helgihald hefur verið mjög takmarkað síðustu 15 mánuði, af orsökum sem okkur öllum er kunn. En  nú förum við vonandi að sjá til sólar í kirkjulegu starfi sem og öðrum sviðum þjóðlífsins. En svigrúm hins kirkjulega starfs hefur þó aðeins verið rýmkað og því ber að fagna. En á sama tíma og ég fagna auknu svigrúmi brýni ég okkur öll til að gæta að hinum persónulegu sóttvörnum og fara í einu og öllu eftir fyrirmælum yfirvalda í þessum efnum.

Þrátt fyrir að almenna reglan um samkomutakmarkanir sé 50 manns, þá er allt að 150 gestum heimilt að vera viðstaddir athafnir trúfélaga að uppfylltum eftirtöldum skilyrðum:  

1. Allir gestir séu sitjandi og ekki andspænis hver öðrum.
2. Allir gestir séu skráðir, a.m.k. nafn, kennitala og símanúmer. Skráin skal varðveitt í tvær vikur og eytt að þeim tíma liðnum.
3. Allir gestir noti andlitsgrímu nema þegar neytt er drykkjar- eða neysluvöru.
4. Tryggt sé að fjarlægð milli ótengdra gesta sé a.m.k. 1 metri.
5. Áfengisveitingar séu ekki heimilar.
6. Skipuleggjendum viðburða er skylt að tryggja þegar gestir eru ekki í sætum, svo sem fyrir og eftir viðburð og í hléi, að ekki komi fleiri saman en 20 manns og virt sé 2 metra nálægðartakmörkun milli ótengdra aðila.
7. Þrátt fyrir að heimilt sé að hafa hlé á viðburðum skal biðja gesti um að halda kyrru fyrir í sætum sínum.
8. Sala eða boð um veitingar er ekki heimil í hléi.

Að lokum hvet ég sóknarbörn mín til að hafa samband við mig ef þörf er á prestsþjónustu. Ég mun leggja mig fram um að þjóna ykkur sem allra best.

Guð gefi ykkur styrk og æðruleysi og blessi ykkur í lífi og starfi, ykkar einlæg, Ursula.

Viðburðir í maí - júní 2021

13. maí kl. 14 Blönduóskirkja Dagur aldraðra - Guðsþjónusta
16. maí kl. 9  Facebook Örhelgistund í streymi
20. maí kl. 17 Blönduóskirkja Aðalsafnaðarfundur
23. maí kl. 11 Blönduóskirkja Hvítasunna - Guðsþjónusta
30. maí kl. 11 Svínavatnskirkja Fermingarguðsþjónusta
6. júni kl. 9  Facebook Örhelgistund í streymi
12. júní kl. 13 Þingeyrakirkja Fermingarguðsþjónusta
13. júní kl. 11 Blönduóskirkja Prjónamessa – Prjónagleði 21
14. júní kl. 9  Facebook Örhelgistund í streymi

Breytingar geta orðið á dagskrá vegna ófyrirséðra orsaka.

Fastir viðtalstímar prests eru í Blönduóskirkju:
Fimmtudaga – föstudaga – laugardaga – sunnudaga frá kl. 9 til 11:00 fyrir hádegi.
Einnig eru í boði viðtalstímar eftir samkomulagi.

Blönduóskirkja og Prjónagleði 2021 
Prjónamessa, sunnudaginn 13. júní kl. 11.00. Kór Blönduóskirkju leiðir almennan safnaðarsöng undir stjórn organistans Eyþórs Franzsonar Wechner. Ursula Árnadóttir þjónar. Allir velkomnir með prjónana sína.

Dagur aldraðra í Blönduóskirkju
Fimmtudaginn 13. maí er uppstigningadagur og „Dagur aldraðra“. Um árabil hefur sá dagur verið tileinkaður eldri borgurum í söfnuðum landsins. Guðsþjónusta er kl. 14.00.  Ásgerður Pálsdóttir formaður Félags eldri borgara í Austur-Hún. predikar. Kirkjukórinn leiðir almennan safnaðarsöng undir stjórn organistans Eyþór Franzsonar Wechner. Prestur safnaðarins þjónar. Kaffiveitingar eftir athöfn. Allir velkomnir.

Aðalsafnaðarfundur Blönduóssóknar
Aðalsafnaðarfundur Blönduóssóknar verður haldinn í Blönduóskirkju fimmtudaginn 20. maí kl. 17. Fundarefni er venjuleg aðalfundarstörf eins og þau eru skilgreind í starfsreglum um sóknarnefndir. Sóknarbörn hjartanlega velkomin og þau hvött til að mæta. Sóknarnefndin.