Samtök sveitarfélaga á Norðurlandi vestra telja mikilvægt að íbúar utan höfuðborgarsvæðisins hafi aðkomu að stjórnum, ráðum og nefndum hins opinbera. Á síðasta stjórnarfundi SSNV var lögð fram ályktun ársþings Samtaka sveitarfélaga og atvinnuþróunar á Norðurlandi eystra um skipan hins opinbera í stjórnir og nefndir.

Í henni er lagt til að í nýrri byggðaáætlun verði aðgerðir sem feli í sér að almennt sé gert ráð fyrir að, a.m.k. þriðjungur einstaklinga sem tilnefndir eru í stjórnir, ráð, nefndir og starfshópa á vegum ríkisins séu búsettir utan höfuðborgarsvæðisins. Þá skorar ársþing á fyrirtæki og félagasamtök sem starfa á landsvísu að horfa til sömu meginreglu.

Stjórn SSNV tekur undir ályktun SSNE og gerir hana að sinni. Byggðarráð Húnaþing vestra hefur einnig fjallað um ályktununina og tekur heilshugar undir hana.