Aðalfundur Ámundakinnar ehf. var haldinn föstudaginn 11. júní sl. í Eyvindarstofu á Blönduósi en félagið stundar útleigu fasteigna og er þátttakandi í rekstri fyrirtækja á starfssvæði sínu. Ámundakinn ehf. Er í hópi „Framúrskarandi fyrirtækja hjá Credit info“ eitt árið enn en fyrirtækinu hefur hlotnast sá heiður hátt í áratug.

Rekstur félagsins var nokkuð góður þrátt fyrir áhrif Covid-19 og skakkaföll hlutdeildarfélaga Ámundakinnar en rekstrartekjur félagsins á árinu 2020 námu 119 mkr. og hækkuðu um 5 mkr. á milli ára eða um 4%. Hagnaður félagsins á árinu 2020 nam tæplega 6 mkr. Eigið fé félagsins í árslok var nokkuð gott eða 456 mkr. samanborið við árið 2019 en þá var eigið fé í árslok 421 mkr.

Hlutafé félagsins í árslok nam tæplega 230 mkr. og voru hluthafar í árslok 78 talsins. Stærstu hluthafar eru Byggðastofnun með 23,24%, Blönduósbær með 11,21%, Hömlur fyrirtæki ehf. með 9,19%, Sölufélag A-Húnvetninga svf. með 8,86% og Húnavatnshreppur með 8,12%.

Að sögn Jóhannesar Torfasonar, framkvæmdastjóra Ámundakinnar ehf., var rekstur félagins á svipuðum nótum og árið 2019. Dálitlar breytingar urðu á hluthafahópnum síðan í ársbyrjun 2020 en einnig keypti félagið hlut Byggðastofnunar í Vilkó ehf. og Hæðinni á Höfðabraut ehf. og greiddi fyrir það með nýjum hlutabréfum. Rifjað skal upp hér að Fasteignafélagið Borg ehf. var sameinað Ámundakinn árið 2019 og þannig bættust í eignasafn félagins húseignir á Hvammstanga og Sauðárkróki sem báðar eru í útleigu. Ráðist var í töluverðar endurbætur á húsnæði því sem hýsir Kidka ehf. á Hvammstanga og húsnæði því sem hýsir Kjörbúðina á Skagaströnd og er þeim endurbótum nú lokið að fullu. Unnið var áfram að endurbótum á húsi og lóð Húnabrautar 4 á Blönduósi en á haustdögum hófu fjórir aðilar þar störf og rekstur og eru það Húnakaffi, USAH/Hvöt, Hárgreiðslustofa Bryndísar Braga og Vínbúðin.

Rekstur Vilko ehf., en Ámundakinn á tæplega 40% í félaginu, var erfiðari árið 2020 en árið á undan. Covid-19 áhrifin vega þar þyngst en á haustdögum var tekin í notkun um 160 fm vörugeymsla og móttökuhús. Vilkó ehf. keypti síðan fyrirtækið Protis og verður fyrsta verkefnið að byggja yfir starfsemi Protis á Ægisbrautinni og eru framkvæmdir þegar hafnar að byggingu 440 fm húsnæðis í fyrsta áfanga en heildarstærð húsnæðisins verður um 1.200 fm. Rekstur Stíganda ehf. en þar á Ámundakinn tæplega 50% hlut var einnig lakari en árið 2019 en verkefnastaða fyrirtækisins er hins vegar góð.

Ámundakinn ehf. keypti tvær fasteignir á síðasta ári er félagið keypti húsnæði Hárgreiðslustofu Bryndísar Braga á Húnabrautinni og leigði það í framhaldi til Verkís ehf. sem hefur opnað starfsstöð á Blönduósi og þá keypti félagið Húnabraut 5 sem hýsti Arion banka þangað til í byrjun maí 2021.

Jóhannes segir að þegar litið sé til baka frá stofnun félagsins og reynt að leggja mat á starf og árangur félagsins sé ljóst að snertifletir þess við samfélagið séu margir. Ný hús og vinnustaðir eru hinn augljósi vottur, en einnig bein aðkoma að fyrirtækjum. Fastir leigjendur eru nú 26 og hefur Ístex verið frá upphafi. Húseignir félagsins eru um 12.000 fm og í við lauslega athugun eru á annað hundrað manns sem stunda vinnu í húsum sem Ámundakinn á eða hefur byggt eða átt í „Stór-Húnavatnssýslu. „Enginn getur sagt fyrir um hvað hefði orðið ef félagið hefði ekki komið til, en fullyrða má að landslagið væri á annan veg“ segir Jóhannes.

Stjórn félagsins skipa Pétur Grétarsson, Guðmundur Haukur Jakobsson og Jón Gíslason. Rannveig Lena Gísladóttir gaf ekki kost á sér til áframhaldandi stjórnarsetu. Jóhannes Torfason er framkvæmdastjóri félagsins.