Fréttir | 20. júlí 2021 - kl. 19:34
Birkir Jakob Jónsson gekk til liðs við knattspyrnufélagið Atalanta á Ítalíu á dögunum. Birkir Jakob er fæddur 2005 og er því nýorðinn 16 ára. Hann á ættir sínar að rekja til Húnavatnssýslu því foreldrar hans, Jón Guðmann Jakobsson og Halla Gísladóttir, eru bæði uppalin á Blönduósi. Í byrjun júní var Birki Jakob boðið á reynslu til Atalanta og í framhaldi af því var hann keyptur af Breiðabliki til félagsins.
Mikill áhugi var á Birki frá öðrum félögum bæði frá Ítalíu og Skandinavíu en að lokum valdi hann Atalanta. Liðið spilar í efstu deild á Ítalíu og hann mun byrja að spila með 17 ára liðinu. Atalanta eru þekktir fyrir að vera með framúrskarandi akademíu fyrir unga knattspyrnumenn og er þetta því gríðarlega spennandi tækifæri.