Nýverið fór fram afhending styrkja úr Húnasjóði. Sjóðinn stofnuðu hjónin Ásgeir Magnússon og Unnur Ásmundsdóttir frá Ægissíðu á Vatnsnesi til að minnast Alþýðuskóla Húnvetninga sem Ásgeir stofnaði árið 1913. Þeim hjónum var mikið í mun að Vestur-Húnvetningar hefðu tækifæri til að mennta sig.

Hjónin gáfu einnig kr. 10.000 til Háskóla Íslands árið 1960 vegna herbergis í fyrirhuguðum nýjum stúdentagarði. Herbergið skyldi nefnast Ægissíða og stúdent úr Vestur-Húnavatnssýslu skyldi hafa forgangsrétt til búsetu í herberginu.

Við sameiningu sveitarfélaganna í Vestur-Húnavatnssýslu árið 2000, var Húnasjóður endurvakinn og ný skipulagsskrá rituð. Árlega fer fram úthlutun úr sjóðnum og miðast fjármagn við framlag frá sveitarsjóði ásamt hálfum vöxtum höfuðstóls.

Það kemur í hlut byggðarráðs Húnaþings vestra að úthluta úr sjóðnum, en á 1095. fundi byggðarráðs var samþykkt að eftirtaldir aðilar fengju úthlutað úr sjóðnum að þessu sinni:

Ása Berglind Böðvarsdóttir, B.S. nám í sálfræði.

Fríða Björg Jónsdóttir, B.S. nám í viðskiptafræði.

Inga Rósa Böðvarsdóttir, B.S. nám í almennri hagfræði.

Lóa Dís Másdóttir, atvinnuflugnám.

Þorbjörg Inga Ásbjarnardóttir, B.S. nám í hjúkrunarfræði.

Þórdís Helga Benediktsdóttir, B.S. nám í viðskiptafræði.

Styrkfjárhæð á hvern styrkþega er kr. 100.000.

Sagt er frá þessu á vef Húnaþings vestra.