Nöldrið | 29. október 2021 - kl. 15:24
Spennandi tímar

Alþingiskosningarnar eru yfirstaðnar og eins og gengur eru sumir sáttir og aðrir ósáttir og enn aðrir mjög ósáttir. Ný ríkisstjórn hefur þó ekki ennþá verið kynnt þó meira en mánuður sé liðinn frá kosningunum. Sérkennileg uppákoma varð hjá yfirkjörstjórn í Norðvesturkjördæmi sem enn sér ekki fyrir endan á. Á meðan beðið er eftir niðurstöðu í málinu virðist Alþingi ekki geta komið saman og því hafa núverandi stjórnarflokkar haft nægan tíma til að ræða saman um áframhaldandi samstarf.

Spennandi tímar eru framundan í Austur-Húnavatnssýslu sem varðar framtíðina. Vinna er farin af stað á tveimur vígstöðum um sameiningu sveitarfélaga. Annars vegar milli Blönduósbæjar og Húnavatnshrepps og hins vegar milli Skagabyggðar og Skagastrandar. Íbúar Húnavatnshrepps fengu að kjósa um hvort þeir vildu sameiningarviðræður við Blönduós og samþykktu það með góðum meirihluta. Einnig varð gerð könnun um hug íbúa á Skagaströnd og í Skagabyggð og var mikill meirihluti Skagstrendinga sem vildi sameiningarviðræður við Skagabyggð. Aftur á móti var innan við helmingur íbúa Skagabyggðar sem kaus með slíkum viðræðum, en meirihluti þó, og munaði aðeins um tvö atkvæði. Ég held að langflestir íbúar í Austur-Húnavatnssýslu átti sig á að það þarf að sameina sveitarfélögin í sýslunni. Nú er skriður komin á þau mál og úr því ekki tókst að sameina öll fjögur í einu þá er næst besti kosturinn að gera það í tvennu lagi. Áður en langt um líður verða þau svo öll sameinuðu á einn eða annan hátt, sanniði til. Nú er áætlað að íbúar Blönduósbæjar og Húnavatnshrepps kjósi um sameiningu sveitarfélaganna tveggja þann 19. febrúar á næsta ári og að kynningarfundir um sameininguna verði haldnir í lok janúar eða byrjun febrúar.

Húnavatnshreppur er framsýnt sveitarfélag og hefur átta sig á því að mikil verðmæti liggja í náttúru þess og sögu. Sveitarstjórn hefur látið gera skýrslu um stefnumörkun ferðaþjónustu í sveitarfélaginu og í henni er innviðagreining á núverandi stöðu og svo eru setta fram metnaðarfullar tillögur um verkefni og forgangsröðun þeirra. Þetta er til mikillar fyrirmyndar og einsýnt að fjárfesting í innviðum sem þessum munu skila sér til framtíðar. Best væri auðvitað að sveitarfélögin öll í sýslunni gerðu þetta saman og myndu horfa til fleiri þátta eins og hvernig best væri að byggja samhliða upp gistiaðstöðu til að fá ferðamenn til að stoppa lengur á svæðinu.

Kórónuveirufaraldurinn er hvergi nærri búinn, þó svo að margir vilja helst ekkert vita af honum. Íslendingar hafa staðið sig vel í baráttunni við veiruna og standa flestum þjóðum framar í fjölda bólusettra. Bólusetningin virðist ekki duga til að kveða niður faraldurinn og þegar þessi orð eru skrifuð eru 70-90 einstaklingar að greinast á hverjum degi. Áfram er mikilvægt að hver og einn gæti að sínu persónulegu sóttvörnum og láti skynsemina ráða varðandi fjölmenna staði og samkomur.

Gleðilegan vetur,
kveðja, Nöldri

Höf. Nöldri

Húnahornið - Fréttavefur allra Húnvetninga