Nýja árið tekur á mót okkur líkt og áður með gulum veðurviðvörunum. Það er nú kannski ekkert óeðlilegt, það er nú einu sinni vetur á Íslandi. Annars er varla hægt að tala um að veturinn í vetur hafi verið mikill vetur, hingað til. Líklega eru það gróðurhúsaáhrifin, hlýnun jarðar og allt því tengt, sem er orsökin. Veturinn hér um slóðir hefur styst mikið frá því sem áður var. Vissulega er maður ekki búinn að gleyma óveðrinu sem skall á okkur í desember 2019 og afleiðingar þess. En ég man fyrir tugum ára þegar veturinn skall á upp úr miðjum september og varði til loka apríl. Það er af sem áður var.

Ég verð að hrósa lesendum Húnahornsins fyrir gott val í manni ársins 2021 í Austur-Húnavatnssýslu. Karólína í Hvammshlíð er vel að viðurkenningunni komin og á hana svo sannarlega skilið. Hún hefur unnið frábært frumkvöðlastarf sem mun skila komandi kynslóðum í sauðfjárrækt betri framtíð. Til hamingju Karólína.

Kórónuveirufaraldurinn er á undanhaldi svo mikið er víst, og er það vel. Nýtt afbrigði veirunnar sem kallað er ómíkron hefur ruðst inn á vígvöllinn og sett önnur og hættulegri afbrigði út í horn, um sinn að minnsta kosti og vonandi um eilífð. Ókostur ómíkron er þó sá að afbrigðið dreifir sig meira, er sem sagt meira smitandi. Það þýðir að mun fleiri eru að sýkjast út um allan heim og hefur veiran einnig dreift sér meira um landsbyggðirnar hér á landi. En sem betur fer virðist fólk veikjast minna, færri þurfa á sjúkrahús og er nú svo komið að stjórnvöld, ekki bara hér, heldur um allan heim ætla að aflétta takmörkunum sem verið hafa í gildi. Það eru liðin tvö ár síðan fyrstu takmarkanir voru settar á og ofboðslega vona ég innilega að þessu sé nú að verða lokið og við getum farið að lifa eðlilegu lífi aftur.

Framundan eru kosningar um sameiningu Blönduósbæjar og Húnavatnshrepps. Sameining virðist vera alveg borðliggjandi, eða hvað? Sitt sýnist hverjum en ef vel er rýnt í þau gögn sem samstarfsnefndin hefur sent frá sér þá virðist blasa við að sameining er „no-brainer“ eins og ungafólkið segir. Og líklega er það svo að fleira yngra fólk en eldra vill sameiningu. Ég ætla að spá því hér og nú að sameining þessara sveitarfélaga verði samþykkt með ágætlega miklum meirihluta, og hana nú.

Annað árið í röð verða engin þorrablót haldin í Húnaþingi og er það miður. Lítið þýðir að nöldra yfir því en mikið svakalega verða þorrablótin 2023 skemmtileg. Er strax farinn að hlakka til.

Góðar stundir
Nöldri