Þórhalla Guðbjartsdóttir hefur verið ráðin skólastjóri grunnskóla Húnabyggðar. Þórhalla var áður skólastjóri Blönduskóla en var sagt upp, líkt og öðrum stjórnendum grunn- og leikskóla í Blönduósbæ og Húnavatnshreppi í kjölfar sameiningar sveitarfélaganna. Í apríl var auglýst eftir skólastjórnendum í sameinuðu sveitarfélagi og var starf skólastjóra, aðstoðarskólastjóra, leikskólastjóra og aðstoðarleikskólastjóra auglýst.

Á sveitarstjórnarfundi í gær staðfesti sveitarstjórn Húnabyggðar ráðningu Þórhöllu í starf skólastjóra en frestaði staðfestingu á ráðningu aðstoðarskólastjóra þar til gengið hafi verið frá ráðningunni við Þórhöllu og þá verði henni falið að ganga frá ráðningu aðstoðarskólastjóra með hliðsjón af gögnum ráðningafyrirtækisins Hagvangs. Þá ákvað sveitarstjórn að auglýsa stöður leikskólastjóra og aðstoðarleikskólastjóra aftur.

Deilt um umboð meirihlutans
Í fundargerð sveitarstjórnar frá því í gær lét H-listinn, sem situr í minnihluta í sveitarstjórn, færa til bókar áminningu til meirihlutans um að vanda vinnubrögð í hvívetna þegar unnið væri að ráðningu starfsfólks til sveitarfélagsins. Taldi minnihlutinn að fulltrúar meirihlutans, sem tóku starfsviðtöl við umsækjendur, hafi skort umboð til þess þar sem ekki hafi verið búið að halda fyrsta fund sveitarstjórnar Húnabyggðar og skipa embættismenn, né kjósa í nefndir og ráð. Meirihlutinn vísaði þessu á bug og benti á að ný sveitarstjórn hefði tekið til starfa 15 dögum eftir kjördag og því hafi fulltrúar meirihlutans sem viðstaddir voru viðtölin verið í umboði meirihluta sveitarstjórnar.