Margt og mikið hefur gerst frá síðustu skrifum mínum hér á síðum þessa ágætis miðils sem lifað hefur með Húnvetningum í meira en 21 ár, sem gerir hann að einum elsta vefmiðli landsins. Í síðasta pistli mínum boðaði ég vorkomuna og viti menn, það stóðst. Vorið kom og sumarið líka. Ekki ætla ég að skrifa mikið um veðrið, það er bara eins og það er. Miklu frekar myndi ég kjósa veðrið hér á Íslandi heldur en í Evrópu þar sem hver hitabylgjan á fætur annarri gengur yfir með hita allt að 46 stigum. Líklega megum við Íslendingar búast við því að Evrópubúar haldi áfram að flykkjast hingað í auknum mæli yfir sumarmánuðina til að flýja hitastækjuna á meginlandinu. Sem minnir mig á að við Húnvetningar þurfum að huga betur að uppbyggingu ferðaþjónustu hér í héraðinu.

Í maí fóru fram sveitarstjórnarkosningar á landinu og í fyrsta sinn var kosið til sveitarstjórnar í sameinuðu sveitarfélagi Blönduósbæjar og Húnavatnshrepps sem hlotið hefur nafnið Húnabyggð. Nafnið kom ekki á óvart, það lá beinast við og er bara ljómandi gott. Ný sveitarstjórn tók við völdum og bíður hennar mikilvægt verkefnið að móta og byggja upp nýtt sveitarfélag. Eitt af fyrstu verkum hennar var að ráða nýjan sveitarstjóra og hefur það nú verið gert. Fyrir valinu var Húnvetningurinn Pétur Arason og verður spennandi að fylgjast með því hvernig til tekst með uppbygginguna og mótunina á nýja sveitarfélaginu næstu fjögur árin. Pétri óska ég til hamingju með starfið og velfarnaðar í störfum sínum. Og sömu kveðjur fær Unnur Valborg Hilmarsdóttir sem er nýráðinn sveitarstjóri í Húnaþingi vestra. Hún hefur gegnt starfi framkvæmdastjóra Samtaka sveitarfélaga í nokkur ár með góðum árangri og verður spennandi að fylgjast með störfum hennar fyrir Húnaþing vestra. Það er nefnilega svo að starfs sveitarstjóra er að stórum hluta hagsmunagæslustarf. Það þarf stöðugt að huga að því að verja hagsmuni sveitarfélagsins og héraðsins sem það er í, ekki síst fyrir ríkisvaldinu.  

Húnavakan er nýafstaðin og tókst vel til í ár. Það skiptir svo miklu að veðrið sé gott þegar bæjarhátíðir eru haldnar og í ár var heppnin með okkur. Allt virðist hafa farið vel fram og heimafólk og gestir hæstánægðir. Eins sakna ég frá fyrri Húnavökum og það er stóri fyrirtækjadagurinn. Merkilegt þykir mér ef fyrirtæki á staðnum sjá sér ekki hag í því að opna dyr sýnar fyrir heimafólki og gestum einu sinni á ári, eins og gert var hér nokkrum sinnum áður. Mér fannst oft skapast góð og skemmtileg stemning á stóra fyrirtækjadeginum á föstudegi Húnavöku. Kannski verður hægt að setja þennan lið á dagskrá aftur.

Áfram er haldið í niðurskurði og lokunum á þjónustu hér í Húnaþingi. Ekki er langt síðan að Arion banki lokaði starfstöð sinni á Blönduósi og nú ætlar Olís að loka þjónustumiðstöð sinni á Skagaströnd og breyta henni í sjálfafgreiðslustöð. Ég skil vel Halldór Gunnar Ólafsson, oddvita sveitarstjórnar Skagastrandar, að finnast þessi ákvörðun bæði hundleiðinlega og sorglega. Hún er það. Og eins og svo oft áður eru það excelskjöl sérfræðinga sem ráða og líklega hefur þessi „eining“ ekki skilað nægri arðsemi fyrir hluthafa Haga sem nú eiga þetta ágætis fyrirtæki. Það er nefnilega orðið of mikið þannig að stórfyrirtæki eru að sölsa allt undir sig og allt gengur út á hag hluthafa en hagur viðskiptavina gleymist. Svo skreyta þessi fyrirtæki sig með að vera samfélagslegaábyrg fyrirtæki en virðast ekki átta sig hver sú ábyrgð er, og hana nú.

Hafið þið það sem allra best í sumar

Kveðja, Nöldri