Grunnskóli Húnabyggðar auglýsir á facebooksíðu sinni eftir lestrarömmum og lestraröfum. Hlutverk þeirra er að koma reglulega í skólann og hlusta á nemendur lesa og þannig brúa bilið milli kynslóða. Þórhalla Guðbjartsdóttir, skólastjóri Grunnskóla Húnabyggðar, sagði í samtali við Ríkisútvarpið í gær að lestrarömmur- og afa hafi gefist vel hingað til og mikil spenna sé fyrir því að hefja verkefnið á ný eftir heimsfaraldur.

Á facebooksíðu skólans segir: „Grunnskóli Húnabyggðar hefur verið svo lánsamur að frábærir einstaklingar hafa komið í skólann og hlustað á  börnin lesa fyrir sig og nú þegar Covid hefur að mestu gengið yfir, langar okkur að endurvekja þetta frábæra verkefni. Það er þannig að „ömmur og afar“ koma í skólann á ákveðnum tíma/um og hlusta á börn lesa. Við leitum því til ykkar – er einhver áhugasamur þarna úti sem á lausan klukkutíma á viku – eða fleiri? Athugið að þetta þurfa ekki að vera eiginlegar ömmur eða afar heldur einungis áhugasamir einstaklingar sem bjóða aðstoð sína.

Endilega hafið samband við Heiðbjörtu ritara í síma 455-4750 eða sendið tölvupóst á blonduskoli@blonduskoli.is.“

Í samtali við Ríkisútvarpið sagði Þórhalla: „Þetta er náttúrlega bara frábær viðbót að fá auka hendur inn í skóla og þetta bara skapar mjög góð samskipti og brúar bil milli kynslóða og oft verða þetta svona notalegar stundir. Þannig að það eru margfeldisáhrif af þessu, allir græða held ég. Sumir fá svona auka ömmur og afa. Við höfum reyndar bara einu sinni haft lestrarafa.“

Ömmurnar og afarnir finna hentuga tíma til áheyrnar í samráði við nemendur og kennara og stundum snúast jafnvel hlutverkin við svo ömmur og afar lesa fyrir nemendur. Þó er ekki skilyrði að vera amma eða afi til að veita aðstoð heldur er nóg að hafa áhuga. „Það er bara fólk sem vill oft láta gott af sér leiða og hjálpa til. Og það veitir oft ekki af en að hjálpa til varðandi lestur barna, að grípa fjölbreyttar leiðir,“ sagði Þórhalla.