Fjárhagsáætlun 2023 fyrir sveitarsjóðs Húnaþings vestra og undirfyrirtækja fyrir árið 2023 ásamt þriggja ára áætlun fyrir 2024-20206 var lögð fram til síðari umræðu á fundi sveitarstjórnar í síðustu viku. Áætlunin gerir ráð fyrir neikvæðri rekstrarafkomu á næsta ári en að þrjú árin þar á eftir verði hún jákvæð.

Samkvæmt útkomuspá fyrir árið 2022 er gert ráð fyrir að afkoma sveitarsjóðs verði neikvæð um 127 milljón króna og að árið 2023 verði rekstrarafkoman neikvæð um rúmar 80 milljónir. Í greinargerð með fjárhagsáætluninni segir að sveitarfélagið glími nú við erfiða fjárhagsstöðu líkt og önnur sveitarfélög og að aldrei hafi verið jafn mikilvægt að sýna ráðdeild í rekstri og skynsemi í fjárfestingum. Helstu ástæður erfiðs rekstrar eru sagðar vera há verðbólga, hækkandi vaxtastig, launahækkanir og hallarekstur málefna fatlaðs fólks, auk þess sem heimsfaraldur kórónuveiru hefur ennþá áhrif.

Útsvarsprósenta næsta árs verður óbreytt 14,52%, en hún getur ekki orðið hærri samkvæmt lögum. Gert er ráð fyrir að útsvarstekjur hækki um 5,7% á næsta ári og segir í greinargerðinni að það sé áhyggjuefni að þrátt fyrir fólksfjölgun í sveitarfélaginu undanfarið hafi tekjur frá útsvari hækkað hlutfallslega minnst á þessu ári samanborið við nágrannasveitarfélög. Álagning fasteignagjalda verður einnig óbreytt milli ára 0,4% af íbúðarhúsnæði en hæst má fasteignaskatturinn vera 0,65%. Þrátt fyrir erfiða fjárhagsstöðu ákvað sveitarstjórn að ganga ekki lengra í heimild til skattlagningar á íbúðarhúsnæði og er tekið fram í greinargerðinni að álagningarprósenta fasteignagjalda hjá Húnaþingi vestra sé lægri en hjá flestum sveitarfélögum á Norðurlandi vestra. Þá er gert ráð fyrir að almennar gjaldskrárhækkanir verði um 5,4% á næsta ári en þó muni hreinsun rotþróa og sorphreinsun hækka meira.

Þrátt fyrir að hart sé í ári hjá Húnaþingi vestra er gert ráð fyrir fjárfestingum upp á 175 milljónir króna á næsta ári. Vegur þar þyngst endurnýjun vatnsveitu á Laugarbakka að fjárhæð 74 milljónir og endurnýjun lagnakerfis við sundlaugina á Hvammstanga að fjárhæð 59 milljónir. Auk þess er áformað að setja upp 9 holu frisbígolfvöll árið 2023.

Eins og áður sagði er gert ráð fyrir að rekstrarafkoma næsta árs verði neikvæð um 80 milljónir króna. Árið 2024 er áætlað að hún verði jákvæð um 82 milljónir, árið 2025 um 100 milljónir og árið 2026 um 108 milljónir.

Lesa má greinargerð sveitarstjórnar með fjárhagsáætlun næsta árs í fundargerð sveitarstjórnar frá 24. nóvember síðastliðnum.