Kjör Íþróttamanns ársins 2022 hjá USAH var tilkynnt í gær við athöfn í Íþróttamiðstöðinni á Blönduósi. Íþróttamaður ársins var valin Sigríður Soffía Þorleifsdóttir frá Ungmennafélagi Bólstaðarhlíðarhrepps en hún keppir í frjálsum íþróttum. Sigríður eða Sigga, eins og hún er yfirleitt kölluð, keppti á Héraðsmóti USAH í sumar líkt og undanfarna áratugi og þá keppti hún á Meistaramóti Íslands í öldungaflokki en mótið fór að þessu sinni fram á Sauðárkróki. Þar gerði hún sér lítið fyrir og setti Íslandsmet í hástökki í aldursflokknum 55-59 ára.

Í öðru sæti í kjörinu varð Una Ósk Guðmundsdóttir frá Hestamannafélaginu Neista og í þriðja sæti varð Guðrún Rut Hreiðarsdóttir einnig frá Hestamannafélaginu Neista.

Við sama tilefni voru í fyrsta sinn veittar viðurkenningar til ungra og efnilega íþróttamanna hjá USAH sem tilnefnd voru af aðildarfélögum sambandsins. Eftirtalin hlutu viðurkenningar:

Elías Már Víðisson, Umf. Bólstaðarhlíðarhrepps, Elísa Bríet Björnsdóttir, Umf Fram, Harpa Katrín Sigurðardóttir, Umf. Geislum, Samúel Ingi Jónsson, Skotf. Markviss, Sigurjón Bjarni Guðmundsson, Umf. Hvöt og Sunna Margrét Ólafsdóttir, Hestamannaf. Neista.

Þá var einnig veittviðurkenning fyrir Sjálfboðaliða ársins hjá USAH og í ár var það ritnefnd Húnavökuritsins sem fékk viðurkenninguna en hana skipa eftirtalin:

Jóhanna H. Halldórsdóttir, G. Unnar Agnarsson, Ingi Heiðmar Jónsson, Katharina Schneider, Magdalena Berglind Björnsdóttir, Magnús B. Jónsson og Þórhalla Guðbjartsdóttir.

Nánar má lesa um tilnefningar til Íþróttamanns ársins og fleira á síðu USAH á fésbókinni. Allar myndirnar eru frá USAH.