Aðalfundur Félags eldri borgara í Húnaþingi var haldinn í gær. Á fundinum voru samþykktar tvær ályktanir. Félagið styður málssókn Gráa hersins gegn ríkinu og samþykkti að ábyrgjast allt að 100 þúsund króna framlag til málssóknarinnar, gerist þess þörf. Þá skorar félagið á stjórnvöld að gera breytingar á regluverki Tryggingastofnunar ríkisins svo allir sem eftirlaun eiga að nóta geti lifað með reisn.

Ályktanirnar eru þessar:

Stuðningur við Gráa herinn

Aðalfundur Félags eldri borgara í Húnaþingi, haldinn 28. mars 2023 styður málssókn Gráa hersins gegn íslenska ríkinu.

Grái herinn hefur nú áfrýjað dómi Hæstaréttar Íslands frá byrjun nóvember á síðasta ári til Mannréttindadómstóls Evrópu í Strassborg .

Með áfrýjuninni er reynt til að fá það viðurkennt að núgildandi skerðingarreglur almannatryggingalaga séu úr hófi og standist hvorki íslensku stjórnarskrána né Mannréttindasáttmála Evrópu.

Margir hafa lagt sitt lið við kostnað þessa málareksturs þar á meðal mörg félög eldri borgara og lagði okkar félag kr. 50.000 í málskostnaðarsjóðinn sem hefur staðið undir málarekstrinum og stendur á sléttu í dag. 

Aðalfundur Félags eldri borgara í Húnaþingi samþykkir að ábyrgjast allt að 100 þúsund kr. framlag til málssóknar Gráa hersins , gerist þess þörf.

Áskorun til stjórnvalda

Við könnun á greiðslum frá Tryggingastofnun ríkisins vegna greiðslna á lífeyri til eldra fólks, kemur í ljós að allt að helmingur þessa hóps hefur lífeyri undir lágmarkstekjum á vinnumarkaði til að framfleyta sér á. Orsök þessa margar meðal annars  of lágur lífeyrir frá TR og miklar skerðingar á  greiðslum úr lífeyrissjóðum. Landssamband eldri borgara (LEB)  hefur á undanförnum árum vakið athygli á þessu óréttlæti og rætt  hefur við ráðherra og stofnanir sem með þessi mál fara.

Þar virðist áhugaleysi ríkja hvað þessi málefni varðar. 

Raunveruleikinn er sá að bilið á milli lífeyris almannatrygginga og lágmarkslauna er alltaf að breikka. Lífeyrir frá TR er ekki að hækka í takt við launaþróun og frítekjumörk hækka ekki í takt við breytt verðlag.

Aðalfundur FEBH, haldinn 28. mars 2023, skorar á stjórnvöld þessa lands að gera  breytingar á regluverki TR og lífeyri þaðan, svo allir sem eftirlauna eiga að njóta, geti lifað með reisn í okkar ríka land.

Pólitískur vilji er allt sem þarf.