Ingvi Rafn. Mynd: kormakurhvot.net
Fréttir | 22. maí 2023 - kl. 09:42
Ingvi Rafn Ingvarsson hefur verið ráðinn nýr þjálfari Kormáks Hvatar og gildir samningur hans út leiktímabilið. Aco Pandurevic, fráfarandi þjálfari, sagði starfi sínu lausu eftir tapleik gegn Elliða á laugardaginn. Aco var ráðinn þjálfari fyrir leiktímabilið í fyrra og hafnaði Kormákur Hvöt í 9. sæti í 3. deild. Liðið situr nú í sama sæti eftir fyrstu þrjá leikina sem af er sumri. Ingvi er liðinu vel kunnugur þar sem hann hefur leikið með því í tíu ár og verið iðinn við að skora mörk. Hann var þjálfari liðsins árið 2021 þegar það komst upp um deild.