Félagið Icelandic Roots færði Húnaþingi vestra nýverið upplýsingaskilti um ferðir vesturfara frá Borðeyri undir lok 19. aldar, ásamt trjáplöntum til að gróðursetja við Borðeyri. Á skiltinu koma fram upplýsingar um vesturfaratímabilið og trjáplönturnar eru tákn um „lifandi“ samstarf milli Íslendinga og Vestur-Íslendinga. Gjafirnar voru afhentar við hátíðlega athöfn á Borðeyri og var viðstöddum í kjölfarið boðið til kaffis í Riis húsi. Sagt er frá þessu á vef Húnaþings vestra.

Þar kemur fram að félagið Icelandic Roots var stofnað árið 2013 með það að markmiði að efla áhuga og þekkingu um Íslandssögu og menningu en líka til að styrkja samband Íslendinga og Vestur-Íslendinga. Á tíu ára afmæli félagsins komu sjálfboðaliðar þess saman á Íslandi til að kynnast íslenskri náttúru en líka til að gefa til baka til samfélags forfeðra sinna. Valdar voru fimm hafnir þaðan sem flestir lögðu upp í ferð sína vestur um haf. Hafnirnar sem fengu gjafir frá félaginu voru Seyðisfjörður, Vopnafjörður, Akureyri, Sauðárkrókur og Borðeyri.