Lítið sem ekkert hefur þokast í samkomulagsátt um að slíta byggðasamlögum um Tónlistarskóla Austur-Húnvetninga og Félags- og skólaþjónustu A-Hún. Húnabyggð óskaði eftir slitum á byggðasamlögunum fyrir tæpu ári síðan en áður höfðu öll aðildarsveitarfélögin samþykkt slit á Byggðasamlagi um menningar- og atvinnumál. Málið var rætt á sveitarstjórnarfundi Húnabyggðar í gær og lítur sveitarstjórnin þannig á málið að þau samningstilboð sem sett voru fram af Húnabyggð séu nú út af borðinu, enda hafi þeim ekki verið svarað.

Fram kemur í fundargerð sveitarstjórnar að við vinnu á slitum Byggðasamlags um menningar- og atvinnumál hafi slitastjórn verið sammála um að slíta þyrfti öllum byggðasamlögum samtímis. Síðan þá hafi forsvarsfólk sveitarfélaganna haldið nokkra fundi um hvernig slitin gætu farið fram, en Húnabyggð óskaði eftir því að þau gætu farið fram sem fyrst, þ.e. fyrir lögbundin tveggja ára slitafrest sem væri í árslok 2024. Að málinu hafi einnig komið ráðgjafar frá KPMG sem sett hafi fram tillögur að tilstillan Húnabyggðar. Á þeim tíma sem liðin er hafi lítið sem ekkert þokast í samkomulagsátt og líti Húnabyggð þess vegna á málið þannig að ekki liggi fyrir vilji hjá Skagaströnd og Skagabyggð um að slíta byggðasamlögunum fyrr en í árslok 2024.

„Þannig lítur sveitarstjórn Húnabyggðar svo á að þau samningstilboð sem Húnabyggð hefur þegar sett fram séu af borðinu, enda hefur þeim ekki verið svarað. Af þeim sökum áskilur sveitarstjórn Húnabyggðar sér rétt til að taka málið áfram út frá hagsmunum sveitarfélagsins og íbúa þess,“ segir í fundargerð sveitarstjórnar Húnabyggðar frá því í gær.